Telefono mugikorren iritsierarekin kaleko telefono kabinen erabilera apurka jaisten hasi zen, erabat desagertu arte. Ondorioz, kabina horiek kentzen joan dira gure herriko kaleetatik. Ordizian berriz, horietako bi mantentzeko erabakia hartu du Udalak. Hori bai, erabilera berri bat emanez.
Liburutegi bihurtu dituzte Urdaneta kaleko eta Buztuntza auzoko telefono kabinak. Biak kolore erakargarriz margotu dituzte, horiz Urdaneta kalekoa eta arroxaz Buztuntza auzokoa. Gainera, bietan erabileraren pistak ematen dituzten esaldiak idatzi dira: “Hartu, gozatu eta… bueltatu” eta “Ekarri etxean dituzun liburuak eta bigarren bizitza bat eman”. Izan ere, liburuak trukatzeko helburua dute kabina hauek. Batetik, edonork har ditzazke bertan dauden liburuak, irakurri eta ondoren leku berdinera itzuli. Bestetik, etxean ditugun liburuei bigarren aukera bat emateko ere balio du ekimenak. Irakurri behar ez duzun hori, kabinan utzi eta beste herritar batek gozatu dezake. Denen eskura jartzen dira beraz, eta ordutegirik gabe.