Eskubaloiko hitzordu garrantzitsu bat dugu aste bukaera honetan Ordizian. Gizonezko Senior mailako igoera faseko play off-a jokatuko da Majori kiroldegian.
Euskal Ligarako igoera fasea jokatuko da, Ordiziako Siglo XX Plater Prestatuak, Universidad de Deusto Loyola, Leizaran Ernio Inmobiliaria eta Condunor Askartza taldeen artean. Lau partaideetatik batek, hurrengo denboraldirako Euskadiko Txapelketarako igoera lortuko du.
Ordiziak larunbatean arratsaldeko 18:00etan Universidad de Deusto Loyola taldearen aurka final-aurrekoa jokatuko du. Bertan garaipena lortzen badu, igandean 12:00etan, Leizaran edo Askartza taldearen aurka finala jokatuko du.
Klubak herritarrak animatu nahi ditu kiroldegira, seniorren taldea animatzera. Giroa alaitzeko “Majori pote”-a antolatu dute, edariarekin pintxoa oparituz.