Lazkao Txiki Bertsopaper Lehiaketan parte hartzeko oinarriak kaleratu dira . 33. edizioa izango da aurtengoa eta Argi Berri elkarteak gogora ekarri nahi izan du hasierako helburua. 1992ko lehen edizio horretan, Lazkao Txiki bertsolariaren babesa bilatu zuten, bere eredua hartuz, gaztetxoak bertsolaritzara gerturatzeko. Argi Berri elkartetik adierazi dutenez, "Lazkao Txiki izan da eta da oraindik bertsolaritzaren ispilu eta eredu paregabea goierritarrontzat eta berak eta beraren lanak azaltzen dizkie ongien gaurko gazteei bertsolaritzaren itzal-argiak".
Zendu aurretik, lehiaketaren edizio bakarra bizitzeko aukera izan zuen Lazkao Txikik, baina bere itzala handia da eta bera dute oraindik bertsolaritzaren eredu.
Bertsolaritzan ere, gauzak bizkor aldatzen ari direla diote antolatzaileek baina Joxe Mielen espiritua, "euskal espiritua, bertsolari espiritua, txertatu nahi dute ernaltzen ari diren muin berrietan". Eta helburu horrekin abiatzen da 33. edizioa.
Oinarriak
Lanak 2024ko uztailaren 1erako bidali beharko dira eta jatorrizko bertsoak izango dira, argitaratu gabeak eta beste lehiaketa batean saritu gabekoak. Gainera, izenordez bakarrik sinatuko dira.
Lehiaketa hiru mailatan banatzen da:
- Gaztetxoen maila 13 urte artekoentzat izango da eta neurria eta doinua libreak izango dira, ez ordea gaia. Gaia "OLINPIAR JOKOAK BADATOZ" izango da.
- Gazteen maila: 14-18 urte artekoentzat, gaia, neurria eta doinua librea izango da.
- Helduen maila: 2005ean edo aurretik jaiotakoak , gaia, neurria eta doinua librea izango da.
Gaztetxoen mailan, parte hartzaile bakoitzak nahi adina bertsopaper bidal ditzake. Bertsopaper bakoitzeko idatzi beharreko bertsoak gutxienez 2 eta gehienez 4 izango dira. Gazte eta helduen mailetan, berriz, nahi adina bertsopaper bidal daitezke baina bertsopaper bakoitzeko idatzi beharreko bertsoak gutxienez 8 eta gehienez 12 izango dira.
Sariak
Sari banaketa irailaren 15ean egingo da eta hauexek izango dira sariak:
Sariak ondorengoak izango dira:
- Gaztetxoen mailan: 200, 100 eta 50 euro.
- Gazteek: 300, 200 eta 100 euro.
- Helduek: 500, 400 eta 300 euro.
Informazio guztia hemen