Goizeko lehen ordutik, Garagartza plazan latxa arrazako 50 bat artzainen aharien erakusketa-lehiaketa eta salmenta egin dute. Bertan, 200 abelburu inguru izan dira ikusgai. Bi motako animaliak izan dira erakusketa horretan: latxa mutur-gorriak eta latxa mutur-beltzak.
Plaza berean, gazta egin dute eta baita mamia dastatzeko aukera egon da, ardien ile-mozketarekin batera.
Gaztetxoenentzako ere, ‘Artzainen Herri Kirolak’ jolasak eskaini dira Frontoi txikian.
Tradizioari eutsiz, transhumantzia irudikatzeko artaldeak herrigunea igaro du 11:00ak bueltan. Aurten 1.500 ardi inguru pasa dira, 5 artaldetan banatuta.
Egun berezi honekin amaitzeko, Ordiziako Udaletxeko Batzar aretoan, Arabako Santikurutze Kanpezuko Arrea! Jatetxeko Edorta Lamok gazta berria ebaki du, Idiazabal gaztaren denboraldi berriari hasiera emanez.
