Kimetz Emakumeen elkartearen XXX. Kontaketa lehiaketan parte hartzeko izen ematea zabaldu dute. Apirilaren 19a izango da lanak aurkezteko azken eguna eta pertsonako kontakizun bakarra onartuko da. Lanak kimetzemakumeenelkartea@gmail.com helbidera bidali behar dira mezu bidez, eta bigarren mezu batean azaldu beharko dira gaiaren izenburua, leloa eta parte hartzailearen datuak.
18 urtetik gorako edonork parte har dezake lehiaketa honetan. Lanak, derrigorrez, lehenengo aldiz aurkeztuak izango dira eta beste inon saritu gabeak. Saririk jasotzen ez duten lanak ez dira itzuliko.
Gaia librea izango da; gutxienez 5 eta gehienez 10 orriko kontakizunak izango dira, euskaraz nahiz gaztelaniaz idatzita. Lanen aurkezpena mekanografiatua izango da, espazio bikoitzean eta orriak alde batetik idatzirik. Gainera, sexismorik gabe hizkera erabiltzea kontutan edukiko da.
Epaimahaia literatur munduko adituek osatuko dute eta beren izenak erabakiarekin batera ezagutaraziko dira. Erabaki hori maiatzaren eta ekainaren bitartean jakinaraziko da.
600 euroko bi sari banatuko dira, euskarazko eta gaztelerazko bi lan onenei. Horrekin batera, saritutako bi lanen artetik, bat ez bada gutxienez emakumeren batena, accesit bat banatuko da emakumeren batek idatzitako kontakizun onenarentzako, 200 €koa.
Gainera, ordiziar batek idatzitako kontaketarik onenak 150 euroko saria izango du.