Emaneurre taldeak Abentura eta Bidaia astea antolatu du lehendabiziko aldiz. "Euskal Herritik mundura eta mundutik Euskal Herrira ekarritako bizipenak, erronka zaharrak, bide berriak eta utzitako arrastoak" bildu dituzte ziklo honetan. Taldeko kideek adierazi dutenez, "abenturazale eta erronkazaleen topalekua izatea nahi dugu, baina Emaneurreren helburuekin bat, gaur egun gero eta urriagoak diren euskarazko edukiak eta aisia eskiniko dituen tokia ere izando da"
Otsailaren 26tik 29ra ospatuko da astea eta ikus-entzunezkoen ondoren protagonistekin solasaldia zabalduko da. Emanaldi guztiak Delikatuz zentroan izango dira. Hau da prestatu duten egitaraua.
-Otsailaren 26an, 19:30ean. Biziz proiektua.
Jon Rodriguez ordiziarraren eta Pello Alberdi hernaniarraren urtebete inguruko bidaia biltzen du. Ikasketak amaituta, Hegoafrikatik Euskal Herrirako bidaia egin zuten bizikletarekin. Esperientzia asko bizi eta jende asko ezagutzeaz gain, Gobernuz Kanpoko hainbat Erakunde bisitatu zituzten ibilbidean. 2021eko irailean ekin zioten abenturari.
-Otsailak 27, 18:30ean. Bideak Zabaltzen.
Jordaniar zein arabiar desertuetan sei eskalatzailek bizitako abentura jasotzen du. Bidaiaren helburua hareharrizko paretetan eskaladako bide berriak irekitzea izan zen. Paisai laranjetan zehar abentura berrien egarri diren sei emakumeak hirurehun metro arteko hamabi bide berri zabaltzea lortzen dute.
-Otsailak 28, 19:30ean. Itzuli.
Jokin Muñoz ordiziarrak belaontziz Iberiar peñintsulari emandako ITZULIa kontatzen da dokumentalean. Oriotik abiatu eta hiru itsasotan nabigatu ondoren MIDI kanaletik berriro ere Kantauri itsasora. Nabigatzen zein portuz portuz bizi izandakoa, orkekin izandako arazoak eta 3 hilabetetan bizi izandako abenturak kontatuko ditu
emanaldi hontan eta ondorengo tertulian.
-Otsailak 29, 19:30ean. Arrastoan.
1974an, sei lagunez osatutako talde batek Laponia gurutzatu zuen alderik alde. Tartean zeuden David Hernandez, Jose Luis Lekuona Gorri, Antxon Bandres eta Mikel Zabalza tolosarrak. 2018an, berriz, aurrekoek irekitako bideari segika, Iker Iriartek, Pablo Dendaluzek, Aitor Ossak eta Josu Iztuetak Laponiara bidaiatu zuten, eta han egindako eski-zeharkaldiaren kontakizuna da. Bertan grabatutako irudiekin, artxiboko materialarekin eta elkarrizketa eguneratuekin ondu duten 45 minutuko ikus-entzunezkoa da Arrastoan. Josu Iztuetak eta Iker Iriartek kontatuko dituzte bidaiaren nondik norakoak.