Ordizia 2030 Ekintza Plana eguneratzeko bi parte hartze saio egingo dira. Izan ere, Adur Ezenarro alkateak adierazi duenez “etorkizuneko herria eraikitzeko ezinbestekoa da bide orri garbi eta eguneratua izatea”.
Horrela, bi bilera deitu dira. Lehena otsailaren 6an arratsaldeko 18:30etan izango da Barrena Jauregian. Bertan, Lurraldea eta Antolaketarekin zerikusia duen edukia landuko da eta ekarpenak egiteko aukera egongo da. Maitane Alvarez alkateordeak adierazi duenez, bilera honetan herriaren hiri-garapena, garapen ekonomikoa, mugikortasuna eta naturaren zaintzari lotutako gaiak landuko dira.
Bigarren parte hartze saioa otsailaren 15ean egingo da, arratsaldeko 18:30etan Barrena jauregian.
Bertan herritarrekin harremana duten gaiak landuko dira, besteak beste, gizarte-ongizatea, berdintasuna, osasuna, euskara eta kulturarekin zerikusia duten gaiak.
Hala, gonbitea helarazten zaie herritar guztiei parte hartze saio hauetara gerturatu eta iritzi zein proposamenak egiteko.