20 edizio betetzen ditu aurten Ordiziarrock jaialdiak, eta zenbaki borobilaren mailako kartela osatu dute antolatzaileek. Urriaren 19an hasita, hiru eguneko jaialdia izango da 20. Ordiziarrock.
Ostegunean D'elikatuzen ekingo diote jaialdiari, Pello Ramirez eta Nacho Soto musikariek. Kontzertu intimoa eskainiko dute Ramirez akordeoi eta biolontxelo jotzaile ordiziarrak eta Soto Soto pianista asturiarrak.
Ostiralean frontoian izango dira kontzertuak. Delirium Tremens 80ko hamarkadan sortutako rock talde mutrikuarra, Ginger postpunk hirukotea eta Bake Faltsua ordiziarrak igoko dira oholtzara.
Larunbatean ere frontoian egingo dituzte kontzertuak. Belako talde mungiarra izango da bertan, disko berria aurkezten. Kerobia talde iruindarra ere bertan izango da, iaz osasun arazoengatik huts egin ondoren. Larunbateko izen zerrenda itxiz, Balloon Frame hip hop eta rap taldea izango da frontoian.
DJak ere izango dira frontoia girotzen: ostiralean Balins Rock & Roll DJ eta larunbatean N-Lezz.
Antolatzaileek gogorarazi dute kontzertu guztiak doakoak izango direla.