Ordiziako Otegienea auzoko Muñoz tabernan, Patxi Epelderen lanen erakusketa zabaldu dute “Tomatelo con arte” egitasmoaren baitan.
Koki Hernandez eta Luis Manuel Ruiz artistek urtarrilean martxan jarritako proiektua da “Tomatelo con arte” eta ordutik hainbat artisten lanak ekarri dituzte Muñoz tabernara. Proiektu artistiko eta kultural moldakorra eta askea da hau, eta artista profesionalen lanei lekua eman nahi diete, erakusketa-aretoak aurkitzeak dakarren zailtasunaz jabetuta.
Udazkeneko erakusketen agenda Patxi Epelderen lanekin ireki nahi izan dute omenaldi gisa eta Koki Hernandezek berak adierazi duen bezala, erakusketa hau da urdurien jarri duena Patxiri zion mirespenagatik, bai artista gisa, bai pertsona gisa. Horrela Epelderen familia eskertu nahi izan du hasieratik erakutsitako prestutasunagatik.
Erakusketa honetan Patxi Epelderen margolanak eta eskulturak ikus daitezke, tartean Amiantorenei lan ezagunaren bozetoa. Erakusketa hau urriaren 8ra arte egongo da ikusgai baina ez da udazkenerako prestatu duten bakarra. Izan ere, abendura bitarteko agenda ere aurkeztu dute. Urrian Mari Ros Prietoren Oxidos erakusketa zabalduko dute, Azaroan Soraya Garciaren Pintura and Permormer eta Abenduan “El arte de la infancia” erakusketa berezia eskainiko da Muñoz tabernan.
