Gogoan elkartearen enkargupean Xuban Intxaustik zuzendutako "Gesto" filma ikusi ahalko da datorren ostegunean, arratsaldeko 19:00etan, Ordiziako Herri Antzokian. Duela urtebete estreinatu zen Donostiako Zinemaldian. Musika Fernando Velázquez konposatzailearena da.
Dokumentalak Euskal Herrian bakegintzaren alde eta indarkeriaren kontea egindako 30 urteko lan-ibilbidearen memoria biltzen du. 1985 eta 2013 urteen artean Gesto por la Paz - Bakearen Aldeko Koordinakundeak jokatutako papera balioan jartzen du. Izan ere, urteotan, Euskal Herriko indarkeria giroan, bakearen eta pertsona guztien giza-eskubideen errespetuaren alde aritu zen lanean. Koordinakundean aritutako norbanakoak dira filmaren protagonistak, eta iraganeko irudiak ikusiz egiten duten bidaiak gidatzen du dokumentala.
Dokumentala ikusi ondoren 20 minutuko solasaldia izango da. Goierriko Bakearen Aldeko Koordinakundean ibilitakoek herritarrei hitzordura gerturatzeko gonbitea luzatzen diete.