Baieztatu da igandean kaleratu ziren Ordiziako udal hauteskundeetako emaitzak okerrak zirela. Gipuzkoako Foru Aldundiaren hauteskundeei eskainitako atarian ikusten den bezala, EAJri zegozkion PSEk lortutakotzat jo ziren 119 boto. EH Bildu, Ordizia Orain Elkarrekin Podemos eta PP alderdien emaitzak berdin gelditu dira.
Akatsaren zuzenketa honek zinegotzien banaketan ere eragina izan du. EAJk zinegotzi bat irabazi du eta PSEk galdu. Hala, Udalbatzaren osaketa aurreko legegintzaldikoaren berdina izango da. 7na zinegotzi izango dituzte EH Bildu eta EAJk, 2 Ordizia Orainek eta bakarra PSEk. Ondorioz, Iñaki Dubreuil, orain arte PSEk zuen ordezkaria, udaletik aterako da 1999tik zinegotzi aritu ondoren. Ana Maria Sanchez izango da PSEren zinegotzia ekainean hasiko den legegintzaldian. Zuzenketaren ondotik EAJk irabazi duen 7. zinegotzia, aldiz, Carlos Castaño izango da.