HINE Group enpresa olaberritarrak beste urrats garrantzitsu bat eman du bere nazioarteko hedapenean, Nord Fluid talde italiarra eskuratuta. Eragiketa honen bidez, osagai eta sistema hidraulikoen sektorean aitzindaria den enpresak bere presentzia zuzena bederatzi herrialdetara zabaldu du eta Europako merkatuan duen lidergoa sendotu du.
Nord Fluid taldeak 40 urtetik gorako esperientzia du hidraulikaren eremuan (1981ean sortu zen Milanen). Enpresa honek urtean 60 milioi eurotik gorako fakturazioa du eta 400.000 erreferentzia baino gehiago kudeatzen ditu stockean. Ekoizpen- eta merkataritza-egitura sendoa du, Italia eta Eslovenia artean banatutako bost ekoizpen-zentroz osatua.
Hazkundea eta helburu ekonomiko berriak
Banaketa eta logistika gaitasunak handitzeaz gain, erosketa honek ate berriak irekiko dizkio HINE Group taldeari industria-sektorean zein mugikortasunean. Eragiketarekin, euskal taldea mundu osoan 1.000 langile izatera hurbiltzen ari da eta gainera, 2027rako 300 milioi euroko fakturazioa lortzeko bidean sendo jarraitzen du.
Lander Guibelalde HINE Groupeko CEOak adierazi duenez: "Nord Fluid HINEra gehitzeak gure banaketa-gaitasuna indartzen du, Europan dugun presentzia zabaltzen du eta industria-merkatuan zein mugikortasun sektorean hazten jarraitzeko aukera ematen digu".
Talde bera gidaritzapean
Akordioaren arabera, HINEk Nord Fluiden gehiengoa eskuratu du orain, eta datozen urteetan kapitalaren % 100 bereganatzeko konpromisoa hartu du. Zuzendaritzari dagokionez, Daniele Brambillak (CEO) eta Alberto Carlo Magrìk (CF&OO) Nord Fluid gidatzen jarraituko dute HINE taldearen barruan, orain arteko egitasmoari eta lantaldeari jarraipena emanez.
Erosketa honi esker, 1974an Olaberrian sortutako familia-enpresa goierritarrak Espainia, Estatu Batuak, Brasil, Mexiko, India, Txina, Polonia, Italia eta Eslovenian ditu ekoizpen zein banaketa zentroak.