Gipuzkoako Aldundiko Kultur Sailak LABO programaren barneko NODEren ‘LABO GEO’ ekimen berria aurkeztu zuen atzo. Dantza eta praktika garaikideak Gipuzkoako landa-udalerrietara gerturatzeko asmoz, hainbat ikuskizun eskainiko dira Mutiloan, Altzon eta Larraulen.
LABO GEO ekimeneko jardunaldietan, kultura, ondarea eta partaidetza sustatuko dituzte jarduera artistiko garaikideak hirietatik deszentralizatzen eta publiko eta espazio berriak sortzen. Horrela azaldu du Goizane Alvarez Kultura diputatuak: "LABO GEO ekimena aukera bikaina da kultura hiriburutik haratago eraman eta herri txikietara gerturatzeko. Horrelako jarduerek, gure tokiko ondareari balioa emateaz gain, landa-udalerrietako kultur bizimodua aberasten dute. Funtsezkoa da jarduera artistiko garaikideak deszentralizatzea eta gipuzkoar guztiei kulturaz gozatzeko aukera eskaintzea haien gertuko inguruneetan."
Jarduerak, non eta noiz
Ekintza hauek aipatutako hiru udalerrietan gauzatuko dira eta bi jarduera egingo dira astero, hiru astez jarraian. Larunbatetan mugimendu, ahots eta plastika-tailer parte-hartzaileak egingo dira eta igandeetan arte eszenikoetako ikuskizunak eta udal ondareaz gozatzeko jai-jardunaldiak.
LARRAUL (Tolosaldea) | Irailak 14 eta 15
- Irailak 14, larunbata: Mugimendu, ahots eta plastika tailerrak. 2 ordu eta erdikoak eta ikusle guztientzat zabalik.
- Irailak 15, igandea: NODEren aurkezpena Baturekin, “Remedios Vals” Jone Amezaga eta Manu Gaigneren eskutik, eta “Lehio zikin, zeru garbi” eskainiko du Mari Zaunkak.
MUTILOA (Goierri) | Irailak 21 eta 22
- Irailak 21, larunbata: Mugimendu, ahots eta plastika tailerrak. 2 ordu eta erdikoak eta ikusle guztientzat zabalik.
- Irailak 22, igandea: Borja Bordonaberen “Solo”, Neri(h)ariren “Nire azalean arrotz?” eta Larrua Proiektuaren “Igi begi” ikuskizunak.
ALTZO (Tolosaldea) | Irailak 28 eta 20
- Irailak 28, larunbata: Mugimendu, ahots eta plastika tailerrak. 2 ordu eta erdikoak eta ikusle guztientzat zabalik.
- Irailak 29, igandea: DABek “Nun Zira?” aurkeztuko du, Cielo Rasok “Reset” eta Osa+Mujikak “Bueltaxka”.
Autobus zerbitzua ipiniko da Donostia eta Tolosatik eta ibilbidean zehar, performancearen bidez helmugako udalerriari buruzko eta eguneko egitarauari buruzko informazioa emango da. Helmugara iristean, udalerriaz eta ondareaz gozatzeko aukera izango dute dantza garaikideari bide eman aurretik. Ondoren, artistek, ikusleek eta antolatzaileek bizipenak elkarbanatzeko aukera izango dute antolatuko diren topaketetan.