San Martin egunaren bueltan hiltzen da txerria eta horren harira 15 urte daramatza Mutiloako Udalak Txerri azoka antolatzen. Aurten azaroaren 5ean, igandean jarri dute hitzordua.
Ohiko denez, jan edanik ez da faltako antolatu duten egitarauan. Goizeko 10etan zabalduko da azoka eta postuak frontoian eta plaza inguruan kokatuko dira. Hauetan guztietan txerrikiak egongo dira salgai, gainera jatorri desberdinetako ekoizleak kultura bakoitzeko ohituretan oinarritutako produktuak eskainiko dituzte. Aditu batek urdaiazpiko mozte erakusketa egingo du eta hau dastatzeko aukera egongo da, odolki eta txorizo dastaketarekin batera.
Txerri erakusketa eta umeetzako eskulan tailerrak izango dira goiz guztian zehar. 12etan berriz odolkiak egiteko erakustaldia egongo da. Eguerdi partean, gose puntua izanez gero, goiz osoan zehar erretako txerrriaren pintxoak dastatzeko aukera egongo da.
Autobus zerbitzu berezia
Auto pilaketak ekiditeko, autobus zerbitzu bereziak jarri dira Txerri azokara joateko. Batetik, Lazkao, Ordizia eta Beasaindik ( Lazkaotik hasita 09:30ean eta 11:00etan eta bueltakoak 12:30ean eta 13:45etan) eta bestetik, Zegama, Segura eta Zeraindik (10:15ean eta 11:45ean abiatuko da joaneko autobusa Zegamatik eta bueltakoak 13:15ean eta 14:30etan abiatuko dira).
