Tabakalerak eta EITBk, euskarazko soinu fikzioa sustatzea helburu duen Audiogile Berriak egitasmoaren irabazleak jakinarazi zituzten atzo Tabakaleran. Aurten, Xabin Fernandez Zubeldiaren 'Zure Ilunetan' proiektua izan da 30.000 euroko aurrekontuaren irabazlea eta GUAU audio plataformaren bidez zabalduko da. "Igogailu batean harrapatuta geratzeak sortzen duen tentsio guztia islatu nahi du 'Zure ilunetan' lanak. Horretaz gain, izaki misteriotsu batzuen lekukotzak dena hankaz gora jarriko du. Zientzia fikziozko kontakizun hau bost ataleko soinu-fikzio bilakatuko da."
Bigarren, Jon K. Sanchezen 'Zure eskaera, prest!', beldurra, suspensea eta umore beltza tartekatzen dituen proiektua. Eta, hirugarren, Gaizka Sarasua eta Iraia Irazustabarrenak sortutako eta misterio kutsua duen 'Kurruka Enea'.
Horrela aurkeztu zuen epaimahaiak 'Zure Ilunetan': "Genero honetako adibide bikaina dela, narratiba-egitura entzutezko euskarrietarako bereziki pentsatua baitago, eta entzulea esperientzia sentsorial eta bizian murgiltzen baitu lehen segundotik bertatik. Nabarmentzekoa da, halaber, Dolby Atmos bezalako teknologia aurreratuekin bat datorren soinu-diseinua, kontakizuna soinu-arteko esperientzia bihurtzeraino. Bestalde, gaia eta gidoiaren tratamendua bereziki erakargarriak dira gazte zein helduentzat: genero anitzak nahasten dituen istorioa; tokiko erreferentzia askorekin; euskara natural eta biziarekin; gizarte-aniztasun sinesgarria erakusten duten pertsonaiekin."