Calcuta Ondoan eta Legorretako Udalak antolatuta, 'Malad, bizi ala ez' dokumentala eskainiko dute datorren asteartean, hilak 22, arratsaldeko 18:30etan Legorretako Herri Antzokian. Dokumentala imochana erakunde feministarekin Bangaloren egindako lanari buruzko dokumentala da. Honek genero biolentziaren arazo estrukturala aditzera ematen du, Indiako emakumeek egoera lazgarri hori gainditzeko duten ahalmena erakutsiz.
Dokumentalak 11 minutuko iraupena du eta ostean, Amrita Das Gupta aktibista eta feminista eta genero biolentzian eta emakumeen eskubideetan aditu indiarrarekin solasaldia egingo da. Horrela aurkeztu du Calcuta Ondoan elkarteak Amrita Das Gupta: 23 urte baino gehiagoko esperientzia du Indiako eta Erresuma Batuko giza eskubideen eta emakumeen eskubideen alorrean. Lan handia egin du esparru profesionalean eta pertsonalean indarkeria, abusua eta diskriminazioa jasaten duten jatorri sozioekonomiko, erlijioso eta kultural desberdineko emakumeei laguntzeko. Bere lan-esperientzia askotarikoa da (etxeko indarkeriaren gizarte-langilea, aktibista, fazilitatzailea, ikertzailea, proiektuen kudeatzailea, defendatzailea eta orain Swayam erakundeko zuzendaria); eta horrek, emakumeen eskubideen mugimenduaren eta sektorearen barruan ulermen eta ezagutza sakona eman dio.
Sarrera doakoa izango da eta Calcuta Ondoan elkarteak goierritarrak gonbidatu nahi izan ditu errealitate hau ezagutzera eta datorren asteartean proiekziora gerturatzera.
