Patxi Ezkiaga idazle, irakasle eta fraide legorretarrak haurra zela sexu abusuak egin zizkiola salatu du Marisol Zamora izeneko emakume donostiar batek. El País egunkariari kontatu dio bere esperientzia, egunkari hau Eliza katolikoaren baitan gertatutako sexu abusuei buruz egiten ari den txosten sortaren baitan.
Ukituak
Emakumeak adierazi duenez, 1978 urtean hasi ziren erasoak, 8-9 urte zituela. Bere magalean eserrarazi zuen eta ukituak egin zizkion. Ezkiaga irakaslea zen Donostian, baina salatzailea ez zen bere ikaslea. Familiako laguna zen legorretarra eta orduan haurra zenaren etxean izan zen lehen eraso hori. Ondotik, Loiolako La Salle ikastetxeko bere bulegora joanarazi zuen, azterketak zuzentzeko aitzakiarekin, eta abusuak errepikatzen ziren. Egoerak 4-5 bat urte iraun zuela adierazi du emakume donostiarrak.
Azken erasoa 1982an jasan zuela kontatu du, 13 urte betetzen zituen egunean. Opari bat emateko aitzakiarekin deitu zuen bere bulegora Ezkiagak eta, magalean eserrarazi ondoren, bularrak ikutu zizkion. Tarte baten ondoren, altxatu eta "Hau azken aldia da; bestela, mundu guztiak jakingo du" esan zion erasotuak. Ezkiagak erantzun zion ez zuela ezer egin. Hura izan zen idazleak eraso zion azken aldia.
42 urte kontatu ezinik
Emakume donostiarrak esan duenez, urte hauetan guztietan ez du jasandako erasoak salatzeko indarrik izan, besteak beste Ezkiaga idazle ezaguna zelako. Orain, egia jakinarazteko beharrak bultzatu du El País egunkariari bere esperientzia kontatzera. Gainera, kasu gehiago daudela adierazi du.
Barne ikerketa
La Salle kongregazioak barne ikerketa bat abiatu duela esan du, baina iraganeko oso informazio gutxi dagoela adierazi du. Ezkiaga Loiolako La Salle ikastetxean irakasle jardun zuen urte luzez.
Legorretako seme kuttun
Patxi Ezkiagak errekonozimendu ugari jaso ditu Legorreta bere jaioterrian. Herriko seme kuttun izendatu zuten 2002an. Herriko kultur etxeak bere izena darama eta, 2021ean, bere omenezko eskultura bat jarri zuten omenaldia egiteaz gain.