Legorretako Udalak azken hilabeteetan Ugaro herri ikastetxean, Herri Antzokian eta Harripila kiroldegian agertutako pintaketak gaitzetsi ditu Udal adierazpen baten bidez.
Pintaketa hauetan, betetik, "gorputz guztiak maite ditugu" idatzia moldatu eta "gorputz batzuk maite ditugu" dio orain. Bestetik, "potolak etxera" dioen pintaketa ere agertu da pareta batean. Gainera, berdintasun eta aniztasunaren aldeko horma-irudi batean "laguntasuna", "maitasuna", "koloreak" edota "errespetatu" bezalako hitzak zirriborratu dituzte.
Udalak kaleratutako adierazpenean, "Legorreta herri anitza, errespetuzkoa, epaiketarik gabea eta ondorioz askea eraiki nahian" dabiltzala azpimarratu dute eta herrian agertutako pintaketek "tristatzen eta haserretzen" dituztela. Legorretan guztiak askatasunean bizitzea jarri dute helburutzat, " jatorria, azal kolorea, itxura fisikoa, maila soziala, desira sexualak edo generoa" edozein izanda ere. Hori "lortu arte lanean buru-belarri" jarraituko dutela adierazi dute. Gaineratu dute ez dela "kasualitatea eskolako ikasleek zein Aiuri talde feministak egindako lanketak izatea jomugan. Kalte zuzena herriko haurren eta neska gazteengan egitea bilatzen dutelako."
Auzolanerako deialdia
Ekintza hauek herritarren erantzuna jasotzeko beharra argudiatuz, auzolana antolatu dute pintaketak garbitzeko. Apirilaren 20an, goizeko 10etan, eskolako patioan egin dute hitzordua.