Larunbat goizaldean Legorretako taberna batean jazotako eraso matxistaren aurrean, astearte arratsalderako elkarretaratzea deitu du Aiuri Talde Feministak, "Erasoen aurrean, autodefentsa feminista" lelopean. Arratsaldeko 19:00etan izango da, herriko plazan.
Legorretako Udalak ere bat egin du deialdiarekin eta adierazpen bat kaleratu du EH Bildu eta EAJ alderdien adostasunarekin. Erasoa irmoki gaitzesten da bertan eta erasoa jasan duen emakumeari babes osoa azaltzen zaio.
Indarkeria matxistari aurre egiteko erantzukizuna kolektiboa dela azpimarratzen da Udalaren idatzian, eta mugimendu feministarekin batera haren aurka borrokan jarraitzeko konpromisoa berresten du.
Amaitzeko, elkarretaratzean parte hartzera dei egiten die herritar guztiei.