Lazkaoko Udalak kezka adierazi du udako igerilekuetan gertatzen ari diren jokabide “desegokien” aurrean. Espazioa garbi mantentzearen garrantzia gogorarazi du, edukiontziak behar bezala erabiliz. Norberaren objektu pertsonalak jaso behar direla ere azpimarratu du.
Bestetik, baimendu gabeko eremuetan uretara egiten diren saltoak deitoratu ditu Udalak, erabiltzaieen segurtasunerako arriskutsuak direla eta. Zentzu honetan, igerilekuko langileei eta, bereziki, sorosleei, errespetua zor zaiela esan du Udalak. Izan ere, haien lana esparruaren segurtasuna eta funtzionamendu egokia bermatzera bideratuta dago.
Gainera, pertsona batzuk ordutegiz kanpo igerilekura sartzen direla detektatu du Udalak, instalazioak itxita daudenean.
Lazkaoko Udalak erabiltzaile guztien erantzukizuna eskatu du, instalazio publikoak behar bezala erabiltzea eskatuz. Arauak betetzea pertsona guztien bizikidetza, segurtasuna eta ongizatea bermatzeko ezinbestekoa dela adierazi du.