Lazkaoko meandroaren inguruan oinezkoentzako bide irisgarriaren obrak amaitu dira. Proiektuaren helburua irisgarritasuna hobetzea eta meandroa udalerriarekin lotzea zen, oztopo arkitektonikoak ezabatuz. Lan hauei esker, meandroaren zelaia inguratzen duen ibilbidea "erosoa, inklusiboa eta pertsona guztientzat irisgarria" dela adierazi du Lazkaoko Udalak. Gainera, esku-hartze honekin, espazio natural bat gerturatu da herrigunera.
Etorkizunean, hiri-altzariak jarriko direla adierazi du Udalak, “hala nola mahaiak eta aulkiak, bisitari guztiek espazioaz eroso gozatu ahal izan dezaten”.
Kepa Zubiarrain alkateak adierazi duenez, “pertsona guztientzako espazio irisgarriagoa eta inklusiboagoa lortu dugu. Proiektu honek oztopo arkitektonikoak kentzen ditu, meandroa udalerriarekin lotzen du eta ingurune naturala errespetatzen du”.
Lanak Construcciones Iturrioz S.A. enpresak egin ditu, 174.354,23 euroko aurrekontuarekin (gehi BEZa).