Eider Mendoza Gipuzkoako diputatu nagusiak, Unai Andueza Ekonomia Sustapen eta Proiektu Estrategikoetako diputatuak, Mauricio Arregui Gipuzkoako Bazkundeko presidenteak eta Javier Zubia erakundeko zuzendari nagusiak, lan-bilera bat izan dute José Ángel Muro Ezarri enpresako Administrazio Kontseiluko presidentearekin eta Xabier Errasti enpresako zuzendari nagusiarekin, lurraldeko enpresa-sarearen errealitatea, bilakaera eta erronkak bertatik bertara ezagutzeko.
Topaketa Gipuzkoako Foru Aldundiak lurraldeko enpresekin hurbiletik lan egiteko duen estrategiaren barruan kokatzen da, haien errealitatea, bilakaera eta aurre egin beharreko erronkak ezagutzeko, arreta berezia jarrita "ezkutuko txapeldunen" eredu diren enpresei: konpainia oso espezializatuak dira, nitxo jakin batzuetan liderrak eta nazioarteko proiekzioa dutenak, eta oinarri-oinarrizko zeregina betetzen dute Gipuzkoako lehiakortasunean eta garapen ekonomikoan.
Mosaikoen merkatuan ibilbide arrakastatsua
Gaur egun, Ezarrik 85 pertsonako plantilla du, eta mundu guztian zabalduta dago; 130 herrialde baino gehiagotara egiten ditu esportazioak.
2020az geroztik, Inzu Group taldeko kide da. Inzu Group nazioartean ezaguna den industria talde bat da, dibertsifikatua, hainbat sektoretan oso espezializatuta dauden enpresek osatua. Inzu Groupen sartzeari esker, Ezarrik bere espezializazioari eta bereizketari eutsi dio, eta, aldi berean, proiektu estrategiko berriei ekin die eta nazioarteko hazkundea sendotu du.
Bileran, sektorearen erronka nagusiak aztertu dira, hala nola nazioartekotzea, berrikuntza teknologikoa eta jasangarritasuna, bai eta testuinguru globalaren erronkei berme osoz aurre egiteko enpresa egitura sendoak izatearen garrantzia ere.
Eider Mendoza diputatu nagusiak nabarmendu duenez, "Ezarri eta halako enpresak Gipuzkoako txapeldun ezkutuen adibiderik onena dira, eta Inzu bezalako talde sendo eta dibertsifikatuetako kide izatea funtsezkoa da epe luzera egonkortasuna, berrikuntza eta lehiakortasuna bermatzeko.”
Bestalde, Xabier Errasti Ezarri enpresako zuzendari nagusiak nabarmendu duenez, “Ezarri-n beira birziklatuko mosaikoaren sektorean lider izatea lortu dugu jabetzaren eta, batez ere, gure talde osoaren ahaleginari esker. Berrinbertsioaren alde egitea giltzarria izan da gure hazkunderako eta gaur egun garena izateko. Etorkizunari begira, bide beretik jarraitu nahi dugu, baina aurrean ditugun erronkei heltzeko, funtsezkoa izango da erakundeen eta inguruko eragileen babesa izatea”.
Lazkaoko alkatearekin bilera
Lazkaora egindako bisita baliatu du Diputatu Nagusiak, Kepa Zubiarrain alkatearekin biltzeko. Horrela, udaletxean egindako bilera instituzionalean, Lazkaoko Udalak abian dituen proiektu nagusiak aztertu dituzte.
Horien artean, Lazkaomendiko bidearen proiektua nabarmentzen da, lehen fasea 2026ko bigarren seihilekorako aurreikusita dagoena. Lazkaomendiko proiektua gauzatzeko diru-laguntza eskaera gauzatu da dagoeneko, finantzaketa bi erakundeen artean modu partekatuan egin dadin.
Era berean, uholde arazoei aurre egiteko Enpaundi eremuko esku-hartzea jorratu da, eta jarduketa hori Aldundiarekin lankidetzan egingo da, dagoeneko egindako lanei jarraipena emanez.
Osasun arloan, Eider Mendozak eta Kepa Zubiarainek egungo anbulatorioa bisitatu dute, baita datozen egunetan martxan jarriko diren behin-behineko instalazioak ere. Lazkaoko anbulatorio berriaren lanak apirilean hasiko ditu Eusko Jaurlaritzak.
Kepa Zubiarain alkateak positibotzat jo du topaketa hau, erakundeen arteko lankidetza indartzen duela eta lazkaotarren bizi kalitatea hobetzeko proiektu estrategikoetan aurrera egitea ahalbidetzen duela azpimarratuz: “Erakundeen arteko lankidetza etengabea da, eta funtsezkoa da Lazkaoren garapena bultzatzen jarraitzeko”.