Gipuzkoako Foru Aldundiak, sexu-indarkeriaren biktimei laguntza integrala emateko zerbitzua eskainiko duen zentroa zabalduko du Lazkaon. Hasiera batean, Zaldibian kokatzea baloratu zen baina azterketa teknikoak egin ondoren, Lazkao aukeratu da. Horrela, Gipuzkoan kokatuko den Hariberria zerbitzuaren hirugarren zentroa izango da hau.
Maite Peña Zainketa eta Gizarte Politiketako foru diputatuak adierazi duenez, "egoitza berri honek sexu-indarkeriaren biktima diren emakumeei, haien senideei eta gertuko pertsonei arreta integrala emateko sarea indartuko du". Gainera, diputatuak zentroaren kokapenaren garrantzia azpimarratu du: "Zerbitzu hau herritarrentzat eta bereziki emakume biktimentzat irisgarria izatea, kalean egotea, erraz ikusteko moduan, eta herritarrengatik gertu."
Zentro hau Lazkaoko Udalak duen lokal batean egokituko da eta erabakia urtarrilaren 29an ospatutako Osoko Bilkuran onartu zen. Lokala Hirigoien kalean dago, kalean bertan, eta 133,90 metro karratu inguruko azalera erabilgarria du. Aldundia eta Udalaren arteko akordio honen bidez, Lazkaoko Udalak dohainik utzi dio higiezinaren erabilera Gipuzkoako Foru Aldundiari, haren gaineko titulartasuna eta azalera-eskubidea mantenduz. Lagapenak 30 urteko iraupena izango du.
Kepa Zubiarrain Lazkaoko alkateak azpimarratu duenez, “zentro hau Lazkaon kokatzeak Goierri eskualdeko biktimei arreta hurbilagoa, irisgarriagoa eta egokitua eskaintzea ahalbidetuko digu, ingurune segurua, konfidentziala eta beren beharretara egokitua ziurtatuz.”
Harriberria zerbitzuaren datuak
Hariberria zerbitzuak 418 kontsulta jaso zituen 2025ean. Horietatik 165 biktimek egin zituzten zuzenean; 71 ingurukoek, senideek edo herritarrek; eta 176 profesionalek.
Artatutako kasuei dagokienez, Hariberriak 178 emakume biktima lagundu ditu guztira, 2024ko uztailaren 1ean abian jarri zenetik.