Lazkaoko Udalak iraupen luzeko zaintza eredu berri bat osatu nahi du, eta honen eraketan herritarren parte-hartzea bultzatu nahi du. Horretarako, otsailaren 4an topaketa bat egingo dute. Bertan, Udalak iraupen luzeko zainketen tokiko ekosistema bat eraikitzeko hasierako proposamena aurkeztuko die herritarrei. Herritarrek, gainera, udalerriko zaintza eredua hobetzeko eta definitzeko aukera emango duten ideiak, esperientziak eta ekarpenak eman ahalko dituzte.
Proposamena ideia argi eta sakon batetik abiatzen da: “Zaintzea giza izaeraren berezko ekintza da”. Bizitzako uneren batean, pertsona guztiok behar ditugu zaintzak, denok baikara zaurgarriak. Beraz, “zaintzarik gabe, ezin da gizarte justu, kohesionatu eta iraunkorrik egon”.
Premisa horretatik abiatuta, Lazkaoko Udalak zainketei ikuspegi komunitario batetik heltzeko apustua egiten du, bizilagunen inplikazio aktiboa sustatuz, zaintzarako tokiko ekosistema baten eraikuntzan. Proposatzen den eraldaketa ez da alderdi teknikoetara edo asistentzialetara mugatzen; herritarren ikuspegiak txertatzen dituen ikuspegi-aldaketa bat da, eta elkarrizketa kolektibo bat sortzen du, datozen urteetarako adostutako ibilbide-orri batean amaituko dena.
Topaketan parte hartzeko izena emateko epea ostiral honetan amaituko da
Proiektua aurkezteko eta prozesu parte-hartzaile hau herritar guztiei zabaltzeko topaketa otsailaren 4an egingo dute, 17:00etan, Lazkaoko udaletxeko bigarren solairuan. Saioak ordu eta erdi inguruko iraupena izango du, eta bertaratutakoen artean partekatutako kafe batekin amaituko da.
Gonbidapena Lazkaoko zainketen etorkizunari buruz hausnartu eta ekarpenak egin nahi dituzten guztiei zuzenduta dago. Bileran parte hartu nahi dutenek esteka honen bidez , a.naldaiz@lazkao.eus helbidera mezu bat bidaliz, Udalaren telefonora deituz (943 08 80 80), edo aurrez aurre eman beharko dute izena urtarrilaren 30era bitartean.