Ikastolako langileek itxialdia egingo dute Hezkuntza Sailari 2023ko Akordio Laboralean jaso ziren konpromisoak betetzea exijituz. Goierrin, Lazkaoko Ikastola batuko da azaroaren 26ko 19:00etatik azaroaren 27ko 7:30ak arte.
Araba, Bizkaia eta Gipuzkoako ikastoletan burutuko dira itxialdiak
"Hezkuntza Sailak langile guztientzat soldaten parekatzea eta lan-baldintzen homologazioaren azterketa egin dezan eskatzeko, adostu zuen bezala.
Akordioa ez betetzeak eragin zuzena du langileen lan-baldintzetan, izan ere Hezkuntza Saila iskin egiten ari zaio langile batzuen soldata parekatzeari, sinatutako akordioan parekatzea langile GUZTIENTZAT izango zela adostu zuen arren.
Akordio Laboralak jaso zuen lan-baldintzen homologazioen azterketa gauzatu behar da lehenbailehen.
Herri honek behar duen Hezkuntza Sistemaren eraikuntzan jarraitu nahi dugu, eta zuen seme-alabei eskubidez dagokien hezkuntza duina eskaintzen. Hori, langileen lan baldintzekin lotuta dago ezinbestean.
Hezkuntza Sailak Akordio Laboralean hartutako konpromisoak bete behar ditu. Ikastoletako langileok borrokan jarraituko dugu Hezkuntza Sailak dagokiguna eman arte!
Ez dugu borrokan etsiko, oraingoan itxialdian eta aurrerantzean ere beste ekintza batzuk burutuz.
Jo eta ke dagokiguna lortu arte!"