Ostegunean, arratsaldeko 17:00etan, jarriko dituzte salgai “Nik Lazkaon, zuk zergatik ez?” 10. kanpainako bonuak. Salmenta plazan hasiko da eta ondoren udaletxean jarraituko du bulego ordutegian, bonuak agortu arte. Guztira 2.000 bonu jarriko dira salgai Lazkaoko saltokietan kontsumitzeko. Bonu bakoitzaren prezioa 30 eurokoa izango da, eta 40 euroko balioa izango du, 5 euroko zortzi bonutan banatuta. Horietatik hiru bonuk parte hartzen duten saltoki guztietan balioko dute. Gainontzeko bostek, aldiz, elikagai saltokietatik kanpo erabili beharko dira.
Hiru bonu-sorta pertsonako
Aurten, berrikuntza bezala, pertsona bakoitzak gehienez hiru bonu erosi ahalko ditu. Orain arte, ordea, pertsonako bost bonu-sorta eros zitezkeen. Gainera, pertsona bakoitzak beste hiru pertsonaren izenean ere bonuak erosi ahal izango ditu, haien NANak aurkeztuta. Neurri honek helburu du banaketa bidezkoagoa izatea eta herritar gehiagorengana iristea, azken edizioetan bonuak azkar agortzen baitziren. Bonu hauek ekainaren 20ra arte egongo dira eskuragarri.
Nekazal produktuak erosteko bonuak
Herriko dendetan erosteko bonuez gain, nekazal produktuak erosteko bonuak ere jarriko ditu salgai Udalak. 200 bonu jarriko dituzte salgai eta maiatzaren 29tik azaroaren 30era bitartean erabili ahalko dira. Bonu hauek 20 eurotan eskuratu ahal izango dira, eta 35 euroko erosketarako balioa izango dute, ekoizle parte-hartzaileen produktuak eskuratzeko.