"Lazkao, Kirol Sariak" ekimena jarri du martxan aurtengoan Lazkaoko Udalak. Ekimen honen helburua kirolariek Lazkaon maila indibidualean zein kolektiboan egindako lorpenei eta egindako lanari aipamen eta errekonozimendu berezia ematea da. Gainera, sari hauen funtsezko alderdietako bat kirolaren inguruan lan egin duten boluntarioen eta herritarren lana nabarmentzea eta saritzea da, udalerriko kirol esparruari egindako ekarpen baliotsua aitortuz.
Hautagaiak, herritarrek proposatuta
Sarie hauetarako hautagaiak edozein herritarrek, erakundek edota balorazio-batzordeak proposatu ditzakete. Uztailaren 23an zabaldu zen horretarako epea eta aste honetan, abuztuaren 31n, itxiko da. Proposamenak arrazoitu egin beharko dira, merezimenduak eta lorpenak justifikatuz eta azalduz.
Hautagaiak proposatzeko formulario bat bete beharko da; bai internet bidez, Udalean edota Joxemiel Barandiaran kiroldegiaren harreran.
Balorazio Batzordeak aurkeztutako proposamenak aztertuko ditu eta baldintzak betetzen ez dituztenak baztertuko ditu. Merezimenduak nahikotzat jotzen ez badira, ez da saririk emango. Balorazio Batzordeak Gobernu Batzordeari aurkeztuko dio sarien zerrendaren proposamena, bakoitzaren merezimenduak adierazita. Ondorean, Gobernu Batzordeak sarituen zerrenda onartuko du.
Sari banaketa, San Migeletan
Sari hauek urtero banatzeko asmoa adierazi du Udalak. Sari-emate ekitaldia San Migel jaien amaierarekin batera egingo da, saridun bakoitzari ohorezko oroigarri bat emateko ekitaldi publiko batean.