Joan den asteburuan gure taldeak denboraldiko azken hitzordua izan zuen Gasteizko Mendizorrotza igerilekuan jokatutako Euskal Herriko Txapelketan. Asteburu osoan zehar gure igerilariek maila bikaina erakutsi zuten, denboraldi osoan egindako lanaren emaitzak agerian utziz.
Txapelketak zapore oso ona utzi du taldean. Izan ere, marka pertsonal ugari lortu zituzten gure igerilariek, eta horrez gain, hainbat domina ere eskuratu zituzten, egindako lan eta ahaleginaren sari gisa.
Asteburuko albisterik onenetakoak, ordea, Espainiako Txapelketarako lortutako bi gutxienekoak izan ziren. Intxixu Marinek 50 metro tximeletako proban bere bigarren gutxienekoa eskuratu zuen; Markel Araujo, berriz, 50 metro bizkar proban sailkatu zen, Espainiako Txapelketan parte hartzeko txartela lortuz.
Zorionak igerilari guztiei denboraldi osoan erakutsitako konpromisoagatik, ahaleginagatik eta lortutako emaitzengatik.