Martxoaren 20tik 22ra, Sabadell hirian ospatuko da Neguko Espainiako Haur Mailako Igeriketa Txapelketa, estatu mailako egutegiko hitzordu garrantzitsuenetako bat. Hiru egunez, estatuko haur mailako igerilari onenak elkartuko dira lehiaketa honetan, talentua, lana eta ilusioa igerilekuan erakusteko prest.
Parte-hartzaileen artean izango da Ordizia Igeriketa taldeko Unai Etxeberria igerilaria, 50 metro tximeleta proban lehiatuko dena. Beasaingo gazteak ilusio handiz hartuko du parte txapelketan, izan ere, bere lehenengo estatuko txapelketak izango dira.
Unairentzat aukera bikaina izango da kirolari gisa hazten jarraitzeko, esperientzia berriak bizitzeko eta bere adineko igerilari onenetako batzuekin igerilekua partekatzeko. Helburu nagusia esperientziaz gozatzea, ikasten jarraitzea eta uretan ahal duen onena ematea izango da.
Ordizia Igeriketa taldetik nabarmendu nahi izan dute Unaik denboraldi osoan zehar erakutsi duen lana eta konpromisoa, horri esker lortu baitu hitzordu garrantzitsu honetan parte hartzea.
Ordizia Igeriketa taldetik zorte onena opa diogu eta esperientzia zoragarri hau ahalik eta gehien goza dezala!