Ikasturte-amaiera: ekainaren 16an Seguran eta 21ean Zegaman

Bai, bai, bai. Badakigu oraindik ikasturtea bukatzeko puska polita falta dela. Baina gu emozionatuta gaude jada ikasturtearen bukaerako kontzertuekin. Pare bat urte dira ez ditugula jaialdi jendetsu modura egiten, eta irrikitan gaude 2022koarekin.

Duela 2 urteko ikasturte-bukaerako kontzertua birtuala izan zen osorik. Iaz, berriz, aurrez aurreko 2 emanaldi egin genituen eta ikus-entzunezkoetan grabatutako ikasleek jotako hainbat doinu argitaratu genituen ekainean eta uztailean zehar.

Aurten bestelakoak izango dira kontuak. Ekainaren 16an Segurako plazan eta 21ean Zegamakoan, ikasle-saldoa elkartuko da. Ekainaren 21a Musikaren Nazioarteko Eguna da; data seinalatua guretzat. 18:30ean hasiko ditugu jaialdiak. Diploma-banaketa, afari-merienda bukaeran, ikasleentzako autobus-zerbitzua eta ohiko osagaiak bueltatuko dira ikasturteari agur esateko kontzertuetara, baina nobedadeak ere egongo dira: batukada-saioa ere izango dugu, esaterako. Eta horiek ez dira ikasturte-amaierako ekintza bakarrak izango: arku-egiteak, San Joanetako erromeria eta beste izango ditugu aukeran.

Beraz, gorde datak agendan. Aurten bai, musikak kaleak eta plazak hartuko ditu!