TOBERA familiek eratutako kultura-elkartea da. Helburu soziala du, Aizkorpe bailarako herritarrei musika eta dantza irakasteko eta kultura-jarduerak egiteko bokazioa baitu. Horretaz jakitun, AMPO kooperatibak bat egin du beste behin gurekin, eta gure lana diruz laguntzeko erabakia hartu berri du.
Ampo balbulak fabrikatzen eta saltzen dituen kooperatiba da, eta bere egoitza soziala Idiazabalen dago. Zegamako, Segurako, Zeraingo eta Mutiloako TOBERA Musika-eskolak 4 herriotan musikaren arloan egiten duen kultura- eta gizarte-jarduera aintzat hartuta, kooperatibako Kontseilu Sozialak gure ikastegiari diru-laguntza ematea erabaki du aurten beste behin. Izan ere, musika-eskola ez da mugatzen irakaskuntzaren barruan eskolak ematera, eta hainbat ekimen egiten ditu propio Goierriko 4 herriotako kultura-bizitza suspertzeko. Herrietako ohiko ekintza popularrak musikaz laguntzen ere, ekarpen baliotsua egiten du urtero. Horiekin jarraitzea bultzatu nahi izan du kooperatibak. Ampo kooperatiba-elkartearen inguruko informazio zabalagoa kontsulta dezakezue hemen. TOBERA Musika-eskolak apustu garrantzitsua egiten jarraitzen du, tarifa apaletan, musikaren irakaskuntza kalitatez eta profesionaltasunez eskaintzeko. 2021/22 ikasturtean % 23ko igoera izan du musika-eskolak ikasle- eta matrikula-kopurutan, aurreko ikasturtearekiko. Zerbitzu publikoaren izaera errotua duen erakundea da TOBERA. Ampo kooperatiba-elkartearen diru-laguntza bera ere, TOBERAren gizarte-, kultura- eta hezkuntza-dimentsioak indartzera etorri da. Eskerrik asko!
Egin zaitez Komunitateko kide eta eman zure ekitaldien berri!
Argazkiak, artikuluak, hitzorduak, agenda ekitaldiak, eta bestelako edukiak gehitzeko aukera izango duzu webgunera.
KOMUNITATEA