Eguberriotako familia-ospakizunetarako erronka

Eguberrietan gure inguru hurbilean abestu izan diren, baina gaur egun ohikoak ez diren gabon-kanten bila gabiltza. Zuen etxean, familian, auzoan, aiton-amonei entzunda… abestu izan diren eguberri-abestiak grabatu eta bidal iezazkiguzue TOBERA Musika-eskolara! Abesti horiek betiko gal ez daitezen laguntzeaz gain, oparitxo bat jasoko duzu trukean.

Jaso nahi ditugun abestiek ezaugarri hauek bete behar dituzte:

•    BERTAKOAK Gure inguru geografikoan abestutako gabon-kantak izan behar dira. Ez dute balio beste toki batzuetan ohikoak izan, baina hemen ez direnek. Beraz, Bizkaiko Karrantza eskualdeko edo Nafarroako Malerreka eskualdeko kantak, esaterako, ez dira kontuan hartuko.
•    BETIKOAK Gabon-kanta tradizionalak izan behar dira. Ez dute balio herri-tradizioa ez dutenek. Beraz, Javi Bustoren eguberri-konposizio garaikideak, esaterako, ez dira kontuan hartuko.
•    EUSKARAZ Kantak euskaraz izan behar dira.
•    Aldaerek ez dute balioko. Adibidez, ohiko kanta tradizional baten gospel moldaketa ez da kontuan hartuko. Kantak osorik edo zati handi batean grabatu.
•    Hemen behean zerrendatutako gabon-abestiek ez dute balioko, ezagunak eta ohikoak direlako gure artean:
 -ADESTE FIDELES
-AI HAU GAUAREN ZORAGARRIA
-ALAKEN
-BIRJINA MAITE
-DIN DAN DON
-EGUARRI BEZPERAN
-ELURRA TEILATUAN
-GAUEKO IZAR
-GOAZEN GOAZEN GUZTIOK
-HATOR, HATOR
-HAUR EDER BATEN BILA
-HAURTXO MAITE
-HIRU ERREGE
-HORRA MARI DOMINGI
-JO TXISTU
-KANPAIAK JAIETAN
-KAS KAS KAS ATEAN / KAX KAX ATARIAN
-LO DAGO GURE HAURTXOA
-MESIAS SARRITAN
-OI BETHLEEM
-OILARRA KANTA KANTARI
-OLENTZERO BEGI GORRI
-OLENTZERO BURU HANDIA
-OLENTZERO JOAN ZAIGU
-URTARO ZURIKO EMAKUMEA
-ZER ZABILTZATE ARTZAINAK

Mutiloako, Segurako, Zegamako edo Zeraingo edozein herritarrek har dezake parte. Musika-eskolan aritu ala ez.

Nola parte hartu:

Abestiaren audioa edo bideoa bidali TOBERAra:
•    Instagram-etik pribatuan > kontuaren izena: @musikaeskola
•    Facebook-etik pribatuan > kontuaren izena: /Tobera Musika-eskola
•    E-maila idatzi eta bertara atxikita* > e-postaren helbidea: tobera@tobera.org
(*) tamaina handiko fitxategia baldin bada, tori.eus webgunea edo WeTransfer erabilita egin dezakezu, esate baterako. Edo Drive, Dropbox… esteka partekatu.
+
Fitxategia bidaltzearekin batera, honako datuak eman, mesedez:
•    Izen-abizenak
•    Bizilekua (gogoratu Mutiloa, Segura, Zegama edo Zerain izan behar dela derrigor)
•    E-mail helbidea edota telefono-zenbakia
•    Bidali diguzun audioa edo bideoa publikoki zabaltzeko baimena ematen ote diguzun. Baimena emanez gero, musika-eskolaren ohiko kanaletatik hedatzeko aukera emango diguzu: sare sozialak, webgunea, eta antzekoak.

Epemuga: 2023ko urtarrilaren 8a, igandea.

Xehetasun gehiago:

Jasotako audioak eta bideoak gure herrietako 3 ikastetxeen eta 3 abesbatzen esku jarriko dira, aurrerantzean beren dibulgazio-lanetan eta errepertorioetan barneratzeko aukera izan dezaten eta, hala, gabon-kanta horiek nolabait gordeta gera daitezen. Ikastetxe eta abesbatza horiek ez dute audio eta bideoon hedapen publikorik egingo, partaideak horretarako berariazko baimena eman ez badu.

Carrefour Goierriri esker, esandako baldintza guztiak betetzen dituzten abestiak bidali dizkiguten hartzaileek detailetxo bana jasoko dute opari zuzenean, parte hartze hutsagatik (partaidetzak oparien kopurua gaindituko balu, zozketa egingo litzateke). TOBERA jarriko da zuekin harremanetan.

Baldintzak betetzen diren ala ez ebazteko garaian zalantzarik sortuko balitzaio TOBERA Musika-eskolari -batez ere abestiaren izaera tradizionalari edo tokikotasunari dagokionez-, herrietako abesbatzekin batera aztertuko luke egoera jakina.

Ekimen honetan parte hartzeak, ezinbestean, hemen jasotako baldintzak ulertu eta onartzea dakar berarekin. Halaber, izaera pertsonaleko datuen babesaren eta tratamenduaren inguruan indarrean den legeria betetzeko betebeharra bere egiten du TOBERA Musika- eta Dantza-eskolak.

Albiste honen behealdean atxikita duzun fitxategian topatuko dituzu argibide gehiago.

Eguberri on!