Probak Segurako herrigunean prestatuko den zirkuitoan jokatuko dira. Ondorengo ibilbidea osatu beharko dute txirrindulariek: herriko plazan hasi, konbentu ondotik Xesteri Alde auzora igo, bertatik Zerkalde kalea hartu eta Germaneneraino jaitsiko dira txirrindulariak. Ondoren, Kale Nagusian gora igoz plaza parean izango dute helmuga puntua. Kategorien arabera zirkuito honi itzuli kopuru ezberdina eman beharko zaio. Buelta bakoitzak 1,3 kilometroko luzera du.
Lasterketak segurtasunez egin daitezen 16:00:etatik 18:00era bitartean herriko kaleetako trafikoa ,denbora tarte jakinetan, eten egingo da. Lasterketa bakoitza amaitzean autoek izango dute herritik sartu edota ateratzeko aukera. Bidegurutzeak zaintzen egongo diren boluntarioak izango dira trafikoa bideratzeko arduradunak. Segurako Txirrindulari Elkarteak larunbat arratsaldean 16:00etik 18:00era, ahal den neurrian, kotxea ez erabiltzeko deia egiten die herritarrei.
Bizikleta festa
Ekitaldi honen harira, herriko haurrak ziklismo mundura gerturatu asmoz beste bi ekintza ere egingo dira:
- 16:00: Plazan elkartu eta lasterketako zirkuitoa probatzeko aukera irekia.
- 17:30:, Bizikletaren gainean teknika hobetzeko ginkana.
Txirrindulari eskoletako kideek, nahiz herriko haurrek, izango dute bertan parte hartzeko aukera. Haur bakoitzak bere bizikleta eta kaskoa eraman beharko ditu.