Herriko emakumeen lasterketak laugarren edizioa izango du aurten, lehen karreran kadete mailako ziklistek parte hartuko dute. 41 kilometroko ibilbidea osatu beharko dute parte hartzaileek, azken kilometroetan igo beharko duten Zeraingo mendatea izango da karrerako mendate puntuagarri bakarra. 10:40ak aldera espero da lehenengo txirrindularia helmugaratzea.
Ondoren, 16:00etan, bigarren lasterketa hasiko da, kasu honetan junior, 23 urtez azpiko eta elite kategorietako ziklistek parte hartuko dute. Kasu honetan, 60 kilometroko ibilbidea egin beharko dute. Lasterketa honetan, Lierniko gaina hiru aldiz gainditu beharko dute txirrindulariek. Segurako plazako helmugan 12:35ak aldera espero da irabazlea. Emakumezkoen Euskaldun Torneoko lehenengo proba otsailaren 22an jokatu zen Errenteria, Segurakoa torneo honi dagokion bigarren proba izango da. Lasterketa honetan jokatuko dira 2026ko errepideko Euskadiko Txapelketak. Honek punta puntako parte hartzea izatea bermatzen du.
Segurako Txirrindulari elkarteak errepideko lasterketak egiteko laguntza eman duten enpresa, denda eta laguntzaileei esker ona ere adierazi nahi die.
Boluntario eskaera
Segurako Txirrindulari Elkarteak beste behin kruzeak egiteko laguntza eskatzen du. Boluntario taldean emakumezko batzuk badauden arren, gehiago izatea gustatuko litzaigute. Horrela herriko WhatsApp taldean eta sare sozialetan emakumeak kruzeak zaintzera joan daitezen dei berezia egin da. Karreraren antolakuntza lagundu nahi duenak txirrindulari elkarteko kideekin jarri behar du harremanetan.
Beste lau karrera sanjoanak bitartean
Larunbateko lehen lasterketaren ondoren, errepideko beste lau proba ere jokatuko dira aurten Seguran. Eskolarteko karrerak apirilaren 25ean egingo dira, kadete mutilena, maiatzaren 2an, Gizonezkoen Euskaldun Torneoaren baitakoa, ekainaren 6an eta junior mailako Gipuzkoako Itzuliaren azken etapa, ekainaren 22an.