Txirrindularitzak etorkizuna izango badu, elkarrizketa mahai bat sortu behar da instituzio eta lasterketen antolakuntzan gabiltzan eragileen artean. Egoera hau salatzeko manifestazioa egingo da urriaren 13an Donostian.
Zergatik mobilizatu?
- Errepideko lasterketak egiteko Eusko Jaurlaritzako trafiko sailaren oztopoak salatzeko.
- Zikloturisten inguruko legedi aldaketa salatzeko. Egun txirrindulariek bihurgunedun errepide zatietan banakako ilaran joan behar dute, horrek txirrinduzaleak duen arriskua nabarmen handitzen duelarik.
- Legediak mendi bizikleta probetan, jaitsieretan edo ziklo-krosetan bi metroko pistak erabiltzeko derrigortasuna ezartzen du. Egun proba hauetan istripu larriren bat izanez gero aseguru etxeek ez dute ardurarik hartuko.
- Lotura motoek (enlace-ek) lasterketan behar bezalako aseguruak egiteko dituzten zailtasunak salatzeko. Hauek dira errepideko proben segurtasuna bermatzen duten eragile garrantzitsuenetako batzuk.
- Haur eta gaztetxoek gure nortasunaren parte den kirol honekin gozatzeko aukera izan dezaten!
Protesta martxa, 11:00etan aterako da Donostiako belodromoaren aurretik eta udaletxera arteko bidea egingo du. Manifestazioan, oinez nahiz bizikletaz parte hartu daiteke.
Segurako Txirrindulari Elkarteak manifestaziora joateko DOAKO autobusa antolatu du. 9:30ean herriko plazatik aterako da autobus hori eta mobilizazioa bukatutakoan itzuliko da herrira. Autobus zerbitzua erabili nahi duenak herriko tabernetan jarritako zerrendetan edo elkarteko kideengana zuzenduta eman dezake izena. Autobusean izena emateko azken eguna, urriaren 9a, asteazkena, izango da.
Donostiara txirrinduan joateko aukera ere izango da, 8:30ean herriko plazatik irten eta bukatutakoan herrira itzuliaz.
Segurako Txirrindulari Elkarteak manifestazioari atxikimendua adierazteko argazkia aterako du ostiralean iluntzeko 19:30ean Erreboten. Herriko txirrinduzale guztioi bertaratzeko deia egiten dizuegu!