Segurako txirrindulari Elkarteak ibilbide gorabeheratsua prestatu du. Ohiko baino motzagoa izango den arren, 66 kilometro ditu, lau mendate igaro beharko dituzte txirrindulariek. Lasterketa goizeko 10:00etan hasiko da herriko plazan, Zegamara joan etorria egingo da lehen kilometroetan, ondoren Mutiloara joan eta Zeraingo aldapa igota berriro herrira itzuliko da pelotoia. Atsedenerako tarterik gabe, 22. kilometroan Mutiloatik Liernira igoko dira ziklistak, segidan Atagoitira (32. km) eta honen atzetik Aztirira (38.km). Hiru mendate hauek pasata txirrindulariak Segurarik igaroko dira Barbarira bidean. Zegamatik gora igoko dute 2. mailako mendate hau. Azken gain honetatik Segurako helmugara, Zerain eta Mutiloa pasaz, 9,5 kilometro egongo dira. Lasterketa 11:45 aldera amaitzea aurreikusten da.
Lasterketan Junior mailako ziklista onenek parte hartuko dute, tartean bi herritar izango dira izango da Ethan Cabanillas eta Aitzol Sodupe.
Segurako Txirrindulari Elkarteak bidegurutzeak zaintzeko boluntarioen laguntza beharko du larunbatean. Horretarako karrera baino ordubete lehenago, 9:00etan, herriko plazan izatea beharrezkoa izango da. Segurako Txirrindulari Elkarteak orain artean bidegurutzeak zaintzera etorri ez diren herritarrak ere animatu nahi ditu. Lasterketa egunetan laguntzeko prest dagoen edonork elkarteko arduradunekin harremanetan jarri besterik ez du egin behar.
Apirilean beste bi proba
Junior mailako karreraren ondoren, apirilean eskolarteko probak eta kadete mailako lasterketak ere egingo dira Seguran. Hilaren 20an, larunbata, eskolartekoen txanda izango da; apirilaren 28an, igandea, Kadeteek Jabier Ormazabalen Oroimenezko karrera jokatuko dute.