Itzuli honek duen ikusgarritasuna kontuan izanda eta garailea segundo gutxiren aldeagatik erabakiko dela jakitun, Segurako txirrindulari Elkarteak ibilbide gorabeheratsua prestatu du. Ohiko baino motzagoa izango den arren, 69 kilometro ditu, lau mendate ezberdin igaro beharko dituzte txirrindulariek. Lasterketa arratsaldeko 16:00etan hasiko da herriko plazan, Zegamara joan etorria egingo da lehen kilometroetan, ondoren Idiazabalera joan eta berriro herrira itzuliko da pelotoia. Hortik aurrera mendateak; 26. kilometroan Mutiloatik Liernira igoko dira ziklistak, segidan Atagoitira (36. km) eta honen atzetik Aztirira (42.km). Hiru mendate hauek pasata txirrindulariak Segurarik igaroko dira Barbarira bidean. Zegamatik gora igoko dute 2. mailako mendate hau, bertan erabaki daiteke aurtengo itzuliaren irabazlea. Barbariko gainetik Segurako helmugara, Zerain eta Mutiloa pasaz, 9,5 kilometro egongo dira. Segurako helmugatik lasterketa pasatzen denean (11. km, 20. km, 52.km) tarteko helmugen sarirako puntuak banatuko dira. Asteleheneko etapa 17:35 aldera amaitzea aurreikusten da.
Gipuzkoako Itzuliko gainerako etapetan egiten den bezala, Segurakoan ere ingurumena zaintzeko ahalegin berezia egingo da. Txirrindulariek etapan zehar sortzen dituzten hondakinak, plastikoak edo gel ontziak, bi toki jakinetan bakarrik bota ditzakete. Segurako plazatik Zeraingo bidegurutzera jaisten diren bi aldietan (20. km eta 52.km). Lasterketa amaitu ondoren, antolakuntza taldeko kideak arduratuko dira ibilbidearen zati horretan pilatzen diren hondakinak jasotzeaz eta dena garbi uzteaz.
Lasterketan Junior mailako ziklista onenek parte hartuko dute, tartean izango da Ethan Cabanillas herritarra.
Gipuzkoako Itzuliko etapa izanda, irteeraren aurretik, lasterketan parte hartuko duten 26 taldetako txirrindularien aurkezpena ere egingo da herriko plazan. Proba amaitutakoan etapako sariak banatzeaz gain, sailkapen nagusiko irabazleei ere dagozkien garaikurrak emango zaizkie.