Kadete mailako Euskadiko txapelketa larunbatean Seguran jokatuko da

Erabiltzailearen aurpegia Segurako Txirrindulari Elkartea 2023ko mai. 15a, 08:43

Segurako Txirrindulari Elkarteak antolatu duen proban, Euskadiko txapelduna izendatzeko lehia estua espero da. Lasterketaren irteera eta helmuga puntuak Germanenean kokatuko dira. Beheko Barrioko lasterketak 49. edizioa osatuko du eta beste behin Jabier Ormazabalen Oroimenezko lasterketa izango da.

Karrera larunbat goizean jokatuko da, 58,5 kilometroko ibilbidea osatu beharko dute txirrindulariek.   10:00etan hasiko da lasterketa eta aurreikuspenen arabera 11:40 aldera amaituko da. Ibilbideari dagokionean, Seguratik Zegamara joan-etorria egingo dute txirrindulariek lasterketaren hasieran, ondoren Iurre aldera joango dira eta bertatik Ormaiztegira. Gabiriako bide berritik joan eta zaharretik itzuliko dira berriz Ormaiztegira eta bertatik berriz ere Segurara. Lasterketaren bigarren zatia gogorragoa izango da, berriz ere Iurretik barrena Ormaiztegira joko du pelotoiak eta azken kilometroetan Liernia eta Zerain igo beharko dituzte parte hartzaileek. Lierniko mendatea helmugatik  11,5 kilometrora igaroko dute eta Zeraingoa 4,5era. 

Parte hartzaileei dagokionean, lasterketa honetan 200  txirrindulari  izatea aurreikusten da. Gipuzkoako, Bizkaiko eta Arabako txirrindulari taldeak etorriko dira Segurara. Pelotoian herriko ziklista bat ere izango da, Aitzol Sodupe.

Sariei dagokionean, Euskadiko txapeldunak jantziko duen mailotaz gain, lasterketako lehen hiru sailkatuek jasoko dute garaikurra. Baita ondoen sailkatzen den lehenengo urteko ziklistak, mendateetan puntu gehien lortzen dituenak eta taldekako sailkapeneko buruak ere.

Segurako Txirrindulari Elkarteak proba hau egiteko 50  boluntario inguru beharko ditu. Lasterketa egunean bidegurutzeak zaintzeko prest dagoenak elkarteko kideengana jo beharko du. Elkarteak proba hau antolatzen  laguntzen duen norbanako oro nahiz babesleak eskertu nahi ditu.

Egin zaitez Komunitateko kide eta eman zure ekitaldien berri!

Argazkiak, artikuluak, hitzorduak, agenda ekitaldiak, eta bestelako edukiak gehitzeko aukera izango duzu webgunera.


KOMUNITATEA