Natale Ormazabal eta Danel Madrazok egin zuten Ordiziako Alde Zaharreko patata tortilla goxoena. Hala ebatzi zuen festetako epaimahaiak, eta eguerdian egin zuten txapelketa eurek irabazi zuten. Denera, dozena bat tortilla aurkeztu ziren. Leire Etxeberria – Iride Ardanaz eta Eneko Akallaga – Eneko Samaniego bikoteek osatu zuten podiuma. Garaileek Ordizianeko dendetan gastatzeko 50 euroko eta Lasa harategiko beste 50 euroko bonuak jaso zituzten; gainerakoek, Ordizianeko dendetan gastatzeko 50.
Sekretua gatza neurrian erabiltzea dela kontatu zuen Madrazok. Epaileek ere egin zioten horri erreferentzia, bertsotan. Batzuk gaziak zeudela kontatu zuten eta beste batzuk, gezak. Halaber, tipuladun tortilla aurkeztu zuten. Gehienek egin zuten tipularen aldeko apustua.
12:00etan hasi ziren lanean eta ordubete pasa izan zuten tortillak aurkezteko. Ondo moldatu ziren, guztiek entregatu bai zuten zerbait. Bitartean, bertsolariak aritu ziren Ordiziako plaza girotzen. Hauek izan ziren epaile, Emauneurre taldeko bi kiderekin batera. Aurkezpena, usaina, testura eta zaporea baloratu zituzten.
Ikusle ugari bildu ziren sukaldarien inguruan. Eguna borobiltzeko elkarrekin jan zituzten tortilla guztiak. Platerak garbi itzuli ziren etxera.