2025ean lortutako emaitzekin pozik agertu da AMPO kooperatiba, 281 milioi euroko fakturazioarekin urtea itxita. 2023 eta 2024an inoizko zifra onenak lortu ondoren, emaitzak hobetzen jarraitu du bai fakturazioan, bai eskaera zorroan. Energia-sektoreko erreferente gisa duen posizioa sendotzea ekarri dute hobekuntza hauek.
AMPOren jarduerak hazten jarraitu du, batez ere sektore estrategikoetan, hala nola GNLan (gas natural likidotua), gasaren garraioan eta prozesamenduan, fintzean eta petrokimikan, meatzaritzan, subsea-n eta karbono gutxiko energietan, eta eskaera-zorro sendoa eta lan-karga handia finkatu ditu 2026rako.
AMPOko zuzendari nagusi Ibon Imazek azpimarratu duenez, “AMPOren bilakaerak gero eta zorrotzagoa eta teknologikoagoa den industria- eta energia-ingurunera egokitzeko dugun gaitasuna islatzen du. Gure bezeroen konfiantzak, gure posizio dibertsifikatuak eta berrikuntzaren, nazioartekotzearen eta soluzio aurreratuen garapenaren aldeko gure apustuak modu jasangarrian hazten jarraitzeko eta maila globalean erreferentziazkoak diren bezeroekin harreman estrategikoak finkatzeko aukera ematen digute. Horren erakusgarri da 2026. urte honetarako eta 2027. urtearen hasierarako jarduera bermatuta dugula”.
AMPO, lider globala
Nazioartean sendotzen jarraitzen du AMPOk, funtsezko merkatuetan konplexutasun handiko proiektu energetiko eta industrialak garatuz: hala nola, Estatu Batuetan, Ekialde Ertainean, Asian edota Australian.
Nazioartean duen lidergoa sendotze honetan, berrikuntzak duen pisua azpimarratu dute AMPOn, gero eta aurreratuagoa eta efizienteagoa den industria baten beharrei erantzuteko gaitasuna garatuz.
1.000 pertsonako lantaldea du AMPOk Idiazabalen, Indian, Saudi Arabian eta Kazakhstanen dituen ekoizpen plantetan banatuta.