Lehiaketak hiru kategoria izango ditu: A kategorian 16 urtetik gorakoak, B kategorian 13-15 urte bitartekoak eta D kategorian 9-12 urte bitartekoak. Aire zabalean, margolariek herriko edozein txoko marrazteko aukera izango dute.
Goizean A kategoriaren txanda izango da eta goizeko 9:00etatik 10:00etara izena eman beharko dute udaletxean eta 14:30ak arteko epea izango dute lanak aurkezteko. B eta D kategoriko parte hartzaileek arratsaldean 15:00etatik aurrera eman beharko dute izena eta lanak 18:00ak baino lehen aurkeztu beharko dituzte.
A kategoriako saridunak epaimahai batek erabakiko du, B eta D kategorikoak aldiz, zozketaz erabakiko dira. Sari banaketa egunean bertan, ekainaren 1ean, arratsaldeko 18:00etan izango da. Lehiaketara aurkeztutako margolan guztiak ekainaren 10etik 14ra egongo dira ikusgai udaletxeko Areto Nagusian.