Laugarren urtea da, berdintasun planarekin bat eginez, martxoan zehar ekintza ezberdinak antolatzen dituela Udalak, herriko talde nahiz eragile ezberdinen laguntzarekin.
Aurten ere, adin guztiei zuzendutako ekintzak antolatu dira eta martxoaren 1ean egingo dute lehendabizikoa. Pilarreneako ganbaran arratsaldeko 18etan, ziklikotasunaren tailerra egingo da, Lehen Hezkuntzako 5.mailako neskei eta hauen amei zuzendua. Tailer honen helburua ziklikotasunak dituen fase bakoitzeko ñabardurak ezagutzea da. Baita amek transmititzen duten ezagutza indartzea, alabetan sortu ahal diren kezka eta zalantzei bidea ematea. Tailer honetan parte hartzeko beharrezkoa da izena ematea.
Martxoaren 5ean ipuin kontalaria izango da, arratsaldeko 17:30etan Udaletxean. Ana Apika izango da kontalaria eta “Rol jokoa” izango da aurkeztuko duena. Bertan, erantzukidetasuna, etxeko lanen banaketa, etab. jorratzen dira. 5 urtetik aurrerako haurrei zuzendutako ekintza da.
Emakumeen Nazioarteko Egunean, martxoaren 8an, ekintza ugari antolatu dira. Goizean zehar, eskolako haurrek horma-irudia egingo dute, berdintasuna hitza oinarri hartuta. 17:00etan, Adin-etxe jubilatu elkartean txokolatada izango dute bazkide diren emakumeek. Ondoren, 18:30etan, elkarteratzea egingo da herriko plazan Aizan Idiazabaleko talde feministak deituta. Jarraian, Axari dantza taldeak gidatuta, dantza emanaldia egon da. 19:15etan, poteo musikatua egongo da herrian zehar eta 21:00etan afaria Elizalde elkartean (tiketak Guztan egongo dira salgai, 20€an).
Martxoaren 10ean, Gaztelekuko gazteek berdintasun ihes-gelan parte hartzeko aukera izango dute. Horretarako aurrez izena eman beharko dute Gaztelekuan. Martxoaren 11an irakurketa taldean Karmele Jaioaren `maitasun kapitalak´ libururen inguruko lanketa egingo dute. Taldea 19:15etan elkartuko da.
Martxoaren 12an, 18:00etan Kontziliazioaren inguruko hitzaldia emango du Irati Aizpurua abokatuak. Bertan, herritarrok ditugun eskubide eta izapideak ezagutzeko gakoak landuko dira: eszedentziak, lanaldi murrizketak, lanaldiaren egokitzapena eskatzeko aukera, eskariak nola egin eta izapideak egiteko gakoak. Hitzaldia haur bat espero duten familientzat edo honezkero haurrak dituzten familientzat zuzenduta dago. 2 urtetik gorako umeentzako zaintza zerbitzua eskainiko da (aurrez eskaera egin behar da).
Ekintzekin amaitzeko, martxoaren 15ean ZtandaP antzezlana izango da, 19:00etan Guraso elkartean. Mirari Martiarenak eta Idoia Torregaraik generoa hartuko dute umoregai eta eguneroko gaiak lehertzen saiatuko dira betaurreko moreak jantzita. Horretarako orgasmo arrakala, maitasun erromantikoa, señorak eta elkarbizitza izango dituzte hizpide, besteak beste. Kritika eginez, deseraikiz eta barre eraginez bazterrak eztanda arazteko prest etorriko dira. Sarrerak liburutegian egongo dira salgai 5€an martxoaren 4tik aurrera.
Hilabete osoan zehar Apal morea izango da liburutegian, feminismoa ardatz duten liburuez osatutako txokoa, hain zuzen ere.