Idiazabalgo Bertso Taldeak bertso-paper lehiaketa bat abiatu du Florentino Goiburu, herriko bertsolaria zena, gogoratzeko helburuarekin. Idiazabalgo bertsozaletasuna sustatu nahian, ekimen hau urtero burutzeko asmoa dute antolatzaileek.
Interesa duen edonork har dezake parte eta bi kategoria izango dira. A kategorian 2008 eta 2011 urteen artean jaiotakoak bilduko dira, biak barne. Hauek lau bertso aurkeztu beharko dituzte. B kategorian, aldiz, 2007an edo aurretik jaiotakoek hartuko dute parte. Hauek 6 bertso idatzi beharko dituzte.
Bi kategorietan, aurkeztutako lanek gai eta neurri librea izango dute, euskaraz idatziak izan beharko dute, jatorrizkoak eta argitaratu gabeak. Gainera, ezinbestekoa da bertsoen doinua zehaztea.
Bertso-paperak Idiazabalgo liburutegian utzi beharko dira urtarrilaren 12a baino lehen. Informazio eta xehetasun gehiago hemen topatu daitezke.
I. Florentino Goiburu Bertso-paper Lehiaketako sari banaketa otsailean egingo dute, Idiazabalgo jaietan.