Azaroaren 11ko greba egunean Goierrin ere izango dira mobilizazioak. Etxebizitza eskubidea aldarrikatzeko, Goizean hiriburuan egingo dituzte manifestazioak Etxebizitza sindikatuek, euskal gehiengo sindikalak eta herri mugimenduko hainbat eragilek. Donostian 12:30etan izango da. Arratsaldean herrietara mugituko da protesta. UGT eta Comisiones Obreras sindikatuek, berriz, 12:00etan egingo dute manifestazioa Gipuzkoako hiriburuan.
Goierriko manifestazio nagusia, Ordiziatik Beasainera
Goierrin manifestazio nagusia Ordiziatik Beasainera egingo dute, Ordiziako arboledatik arratsaldeko 18:00etan abiatuta. Aurrez, Zaldibian 17:00etan ere mobilizazioa egingo dute herriko plazan.
Etxebizitza sindikatuek, euskal gehiengo sindikalak (ELA, LAB, ESK, Steilas, Hiru eta Etxaldek) eta herri mugimenduko hainbat eragilek deitu dute greba elkarrekin.
Deitzaileek espekulatzaileak, errentistak eta etxebizitza negozio bihurtu duten eragileak jo dituzte egoera honen erantzule nagusitzat. Hala ere, espekulazioa ahalbidetzen eta sustatzen duten baldintza legal eta ekonomikoak sortzen dituztenen erantzukizun politikoa ere seinalatu dute. Ildo horretan, eskuineko alderdien politikak ez ezik, errentismoari eusten dioten eta jabeen zein espekulatzaileen etekinak babesten dituzten gobernuen politikak ere salatu dituzte.
Euskal Herrian, konplizitate instituzional hori Eusko Jaurlaritzaren, Nafarroako Gobernuaren eta foru aldundien etxebizitza-politiketan islatzen dela salatu dute. Era berean, udalek etxegabetzeak baimentzen edo gauzatzen jarraitzen dutela salatu dute, kaltetutako pertsonei bizitzeko alternatibarik bermatu gabe.
Egoera horren aurrean, neurri partzialak eta promesa instituzionalak ez direla nahikoa deritzote. Etxebizitza, osasuna edo hezkuntza bezala, eskubide unibertsal gisa bermatu behar dela aldarrikatzen dute eta, horretarako, ezinbestekoa dela espekulazioarekin eta errentismoarekin amaitzea.
Hiru aldarrikapen nagusi
Azaroaren 11ko greba nagusiak hiru aldarrikapen nagusi ditu: espekulatzaileen esku pilatutako etxebizitzak desjabetzea, etxebizitzaren erabilera espekulatiboa debekatzea eta etxebizitza zein haren baliabideak gizartearen beharren arabera antolatzea, merkatuaren logikaren ordez.