Goierriko 22 sortzaileren lanak Mexiko Hirian izango dira ikusgai 2026ko azaroaren 14tik 27ra, "Nihilismo minimoa" erakusketa kolektiboan. Astrolab plataformako Guillermo Clemente komisarioaren eta Gorka Larrañaga artistaren elkarlanetik sortutako ekimenak Arteria Errizomaren lankidetza du, tokiko arte-sorkuntza nazioarteko publiko eta kultur eragileengana hurbiltzeko.
Erakusketa Condesa auzoko Jesús Romero Flores Kultur Etxean egingo da. Goierriko sortzaileek beren egungo praktika artistikoaren ideia, kezka edo jarrera bat formatu txikiko pieza batean sintetizatzeko gonbidapenari erantzun diote. Proposamenak begirada artistiko desberdinak elkartuko ditu, funtsezkoa adierazteko modu berriak aztertzeko.
Arteriakk erakusketaren produkzio-gastuak finantzatuz lagunduko du, sortzaileen lanak Mexiko Hirian aurkeztu ahal izateko. Lankidetza horrek Goierriko artearen nazioarteko ikusgarritasuna sustatuko du, eta beste kultura testuinguru eta publiko batzuekin harremanak zabaltzeko aukera eskainiko du.
Erakusketan parte hartuko duten 22 sortzaileak Ana Cabezas, Angel Frías, Gorka Salmeron, Gurutze Mujika, Iban Aranburu, Iker Antia, Iker Dorronsoro, Iker Valle, Iñaki Zabaleta, Javier Soto, Jesús López Zulueta, Jesus Mari Rodríguez, Jokin Telleria, Jose Luis Elexpe "Pelex", Joxemari Telleria, Juan Ayesta, Kontxi Simon, Noemi Saralegui Barandiaran, Peio Goello, Sergio De La Fuente, Uxue Iruretagoiena eta Victor San Juan Gonzalez dira.