Goierri BarNETik sareak “interesgarritzat” jo du ArcelorMittalek, CAFek eta Delfosek aurkeztutako biometano-plantaren proiektua. Sarearen zuzendaritza-organoaren arabera, «aipatutako enpresek aurkeztutako biometano-instalakuntzaren proiektua koherentea da eskualdean zehaztutako deskarbonizazio-estrategiarekin” .
Gai hau aztertzeko eratutako mahai-teknikoak egindako txostena kontuan hartuta hartu du zuzendaritza-organoak proiektua interesgarritzat jotzeko erabakia, “espero diren inpaktuak eta aurreikusitako arintze-neurriak kontuan hartuta”.
Dena den, “horrelako instalakuntza batek duen garrantzia kontuan hartuta”, Goierri BarNETik-ek helarazitako oharrean azpimarratu du “instalazioaren inpaktuak behar bezala aztertzea garrantzitsua” dela eta, horretarako, “informazioa partekatu eta sor daitezkeen zalantzak argitzeko prozesuarekin jarraituko” duela. Horrela, herritarren eta eskualdeko eragileen iritziak eta ekarpenak jasotzeko partekatze-prozesua abiatzea erabaki du.
Deskarbonizazioaren helburuaren barruan kokatutako proiektua
Proposamena 2025eko maiatzean aurkeztu zuten ArcelorMittalek, CAFek eta Delfosek. Sustatzaileen arabera, Goierrin biometanoa sortzeko planta bat eraikitzea zen asmoa, bere ekoizpena enpresa horien autokontsumora bideratzeko.
Goierri Barnetik-ek adierazi duenez, ekimen hau eskualdean ezarritako energia-helburuak lortzeko baliagarria izan daiteke: 2030erako CO₂ isurketak % 55 murriztea. Goierriko industriaren pisua kontuan hartuta, erronka hori betetzeko ekarpena egin dezakeela planteatu dute sustatzaileek.
Hala ere, proiektuaren berri izan zenean, azpiegiturak sor ditzakeen bestelako inpaktuek kezka eragin zuten eskualdeko eragileen artean. Horregatik, "proiektuaren balizko onurak eta ondorioak informazio kontrastatuaren bidez aztertzeko" mahai-tekniko independente bat eratzea adostu zuten Goierri BarNETik sareak eta enpresek. Hauek izan dira mahi-tekniko horren partaideak: IHOBE, EVE, Ekologistak Martxan, EHU, Neiker eta lehen sektoreko aditu talde bat.
Biometano-planta bat bisitatuko dute
Mahai teknikoak txostena amaitu ondoren, dokumentua eskualdeko hainbat gunetan aurkeztu dute: eskualdeko energia mahaian, Olaberriako bizilagunekin egindako batzarretan, sindikatu eta ingurumen-taldeekin izandako bileran eta Goierri BarNETik sareko 34 eragile biltzen dituen batzarrean.
Orain, Goierri BarNETikek partekatze-prozesuarekin aurrera egin nahi du. Lehenengo urratsetako bat antzeko ezaugarriak dituen biometano-planta bat bisitatzea izango da. Bisita horretan Olaberriako bizilagunen ordezkaritza batek eta eskualdeko eragileen ordezkariek parte hartzea aurreikusi dute.
Helburua instalazio mota horren funtzionamendua eta izan ditzakeen inpaktuak hobeto ezagutzea da, proiektuaren inguruko balorazioa informazio gehiagorekin osatzeko. Era berean, txosten teknikoa eta proiektuari buruzko informazioa eskualdeko eragileen eskura jarriko dituzte.
Bisita egin ondoren, sareak partekatze-prozesuarekin jarraitzeko asmoa du, bisitaren ondorioak eta txosten teknikoaren emaitzak herritarrekin eta eragileekin partekatzeko.
Azkenik, Goierri BarNETikek bere eginkizunaren mugak argitu nahi izan ditu: “planta sustatzaile diren enpresen proiektua da, eta sareak haren inpaktuak aztertzeko prozesua abiatu du, baina ez da proiektuaren egilea”.