Abuztuaren 17tik 19ra bitartean gertatu bezala, datozen egunetan etenda egongo da Beasain eta Tolosa arteko tren zerbitzua. Abuztuaren 29tik irailaren 1era, bidaiariek autobusez egin beharko dute bi geltoki horien arteko ibilbidea, baita tartean dauden geltoki guztietakoa ere. Renfek aditzera eman duenez, Donostia Aldiriak C1 azpiegituran egingo diren lanak dira mozketaren arrazoia.
Hernani eta Irun artean ere, trenik ez
Datozen egunetan Beasain eta Tolosa artean izango den etenaldiari, uztailaren 27tik Hernani eta Irun artean indarrean dagoena gehitu behar zaio. Hala, Ormaiztegitik Donostiara joan nahi duenak trenez egingo du Ormaiztegi eta Beasain arteko tartea eta autobusa hartuko du bertan Tolosaraino. Tolosako geltokian trena hartuko du berriz ere eta Hernanin jaitsi, Donostiaraino eramango duen autobusa hartzeko.
Urriaren 18ra arte luzatuko dira Hernani eta Irun arteko lanak. Hala ere, irailaren 7tik urriaren 16ra bitartean, astelehenetik ostiralera goizeko 4:30tik arratsaldeko 17:30era trenez egin ahalko da bide osoa. Gainontzeko uneetan autobusa hartu beharko da aipatutako tartean dauden geltokietan.
Renfek gomendatu du bidaiatu aurretik ordutegia kontsultatzea webgunean zein aplikazioan.
Media Distancia eta Larga Distancia trenetan ere, etenaldiak
Media Distancia trenei dagokienez, abuztuaren 29tik irailaren 2ra arte, autobusez egingo da Araia eta Irun bitarteko ibilbidea. Larga Distancia trenen kasuan, urriaren 19ra arte Madrildik edo Madrilera doazen trenetako bidaiariek autobusez egin behar dute Gasteiz eta Irun arteko tartea. Bartzelonarekin lotura egiten duten trenen kasuan, autobusez egiten dute Iruñea edo Tolosa eta Donostia arteko bidea, lanen arabera.