Goierri Barnetik sareak prozesu bat abiatu du Goierrin eraiki asmo den biogas planta baten bideragarritasuna aztertzeko. 2025. urteko maiatzean, ArcelorMittal eta CAF enpresek Goierrin biometanoa sortuko duen planta posible bat eratzeko proposamena egin zuten. Sustatzaileen esanetan, autokontsumora bideratuko litzateke egitasmoa. GITB-k jakin ahal izan duenez, Goierri Barnetik sarearen markoan osatutako mahai teknikoa proiektua aztertzen ari da, eta proiektuak sortuko dituen inpaktuen txostena egingo dute, eskualdeko eragileek egitasmoari buruzko iritzi oinarritua izateko.
Goierri Barnetik eskualdeko erakunde publikoek, enpresek eta gizarte eragileek Goierriko etorkizuneko erronkei elkarlanean aurre egiteko sortutako lankidetza-sarea da. Eraldaketa sozial eta ekonomikoa sustatzea du helburu, herritarrekin batera eta gobernantza eredu partekatu baten bidez.
Isurketak gutxitzea helburu
Marko horren barruan, eta energiaren erronkari erantzunez, 2030. urterako Goierrin CO2 isurketak % 55 gutxitzeko helburua ezarri zen. Erronka «anbiziotsua» inondik ere, kontuan hartuta Goierrin industriak duen pisua eta kontsumo energetikoa. Testuinguru horretan iritsi zen bi enpresen proposamena, eta eskualdeko eragile ezberdinekin partekatzen ari dira. Proposamen hori «CO2 isuriak maila esanguratsuan murrizteko garrantzitsua» izan litekeela uste du sareak. Era berean, eskualdeko eragileak jakitun dira proposamen horrek «bestelako inpaktuak ere» izan ditzakeela, kezka sor dezaketenak, eta zuhur baloratzea eskatzen dutenak.
«Dilema batean egon gintezke beraz, eta ahalik eta informazio kontrastatu eta egokienarekin ebatzi beharko da», nabarmendu du Goierri Barnetik sareak.
Jarraitzen batzordearen osaera
Auzi horri erantzuteko asmoz, jarraipen batzorde bat eratu zen Goierri Barnetik markoaren barruan. Leire Artola Beasaingo alkatea, Kepa Zubiarrain Lazkaoko alkatea, Ioritz Berra Zaldibiko alkatea, Egoitz Apaolaza Segurako zinegotzia, Jokin Garmendia Olaberriko alkatea eta Joseba Iztueta Gabiriko zinegotzia dira batzordea osatzen dutenak. Gaiaren arabera, ArcelorMittal eta CAFeko ordezkariek ere hartzen dute parte batzordean, nahiz eta bertako kide ez izan.
Batzorde horrek 2026ko martxoaren 25ean egin zuen lehen bilkura, eta bertako kide guztiek, enpresek barne, mahai tekniko bat eratzea adostu zuten. Horrelako planta batek eskualdean izan dezakeen eragina kontuan hartuta, «alde guztiak ados daude eskualdeko eragileen oniritzia ere jasotzea garrantzitsua» dela esaterakoan. Mahai tekniko horren helburua «informazio eta ezagutza teknikoa eskuragarri jartzea» izango da, «eskualdeko eragileek proposamenaren inguruan iritzi kontrastatua eratu dezaten».
Mahai teknikoko partaideak
Komunikabide honek eskuratu duen informazioaren arabera, mahai tekniko horretan Ihobek (Eusko Jaurlaritzako Ingurumen jarduketarako sozietate publikoa), EEE Energiaren Euskal Erakundeak, Ekologistak Martxan-ek, EHU Euskal Herriko Unibertsitateak, Neiker-ek (Nekazaritza Ikerketa eta Garapenerako Euskal Institutua) eta lehen sektoreko aditu talde batek hartzen dute parte.
Koordinatzaile lanak, berriz, Goierri Barnetik sarearen barruan bestelako lan batzuetan aritu den Sq Consult enpresak egiten ditu. Proiektuaren idazle den Delfos enpresak ere mahai teknikoan parte hartzen du, informazio teknikoa eskuragarri jartzeko egitekoarekin, baina iritzia emateko aukerarik gabe. Mahai teknikoko kideek honako esparruak ordezkatzen dituzte: energia, lehen sektorea, aldaketa klimatikoa, ekologismoa eta ekonomia zirkularra.
Inpaktuen definizioa
Jarraipen batzordearen lehen bilkura horretan mahai teknikoak neurtu beharreko inpaktuak definitu zituzten. Horien arten daude, besteak beste, plantaren bideragarritasun teknikoa, garraio kutsadura, usain kutsadura, ingurumen kutsadura, lehengai mota, lehen sektorean izango duen eragina eta peletizazioak sor dezakeen eragina. «Horretarako etorkizuneko eszenatoki ezberdinak hartuko dira kontuan, baita eszenatoki bakoitzean hartu beharko liratekeen neurriak ere. Era berean, inpaktuak murrizteko hartu ahal diren neurri zuzentzaile edo aringarriak ere aztertuko dira», dio sareak.
Mahai teknikoak dagoeneko hiru bilkura egin ditu, eta behin txosten teknikoa egindakoan, irailean jarraipen batzordea bilduko litzateke berriz, gaiaren inguruko hurrengo urratsak adosteko. Goierriko herritarrei prozesuaren berri «gardentasun osoz» emateko konpromisoa dute eragileek.
Horrelako eragina izango duen proiektu baten azterketa egiterako garaian, alde guztiak «ados» daude Goierri Barnetik lankidetza sarea «eremu ezin egokiagoa» dela esaterakoan. Zentzu horretan, proiektua ekimen pribatukoa bada ere, «interesgarria eta baloratzekoa» dela iruditzen zaie lankidetzaren bidetik gaiari heltzeko parte guztiek erakutsi duten prestutasuna.