'Goierri eskuz esku', Korrika gaitzat hartuta, Goierriko euskarazko hiru hedabideok elkarlanean antolatutako solasaldia da. Goierri Telebista, Segura Irratia eta Goierriko Hitzak, proiektu komunikatibo multimedia baterako bidean, elkarrekin egindako lehen egitasmoa da hau.
Solasaldi honetan lau gonbidatu izan dira gurekin: Nekane Munduate, Goierriko Korrikako arduraduna; Chabeli Sierra, AEKko ikaslea; Xabier Albizu, Errigorako boluntarioa eta Asier Auzmendi, Korrikako parte-hartzailea. Olaberriko erabilera anitzeko aretoan grabatutako saioan AEKko ikasleak izan genituen ikusle gisa.
Goierriko Hitza, Segura Irratia eta Goierri Irrati Telebistako lantaldeak elkarlanean antolatu, prestatu eta aurrera eraman dugu saio hau, eta bertan jasotakoa modu bateratuan ikusi, entzun eta irakurtzeko aukera duzue Goierri Telebista eta gitb.eus atarian, Segura Irratian eta bere webgunean eta Goierriko Hitzako paperezko edizioan, atarian eta Otamotz aldizkari digitalean.
Saio honek AMPO, CAF, Goieki, Hine eta Orkliren babesa jaso du, Korrika eta Goierriko euskarazko hedabideekin bat eginez.