Goierrin, errenta pertsonala 19.175 eurokoa da, 2023ko INEren datuen arabera, eskualdeka eta herrika dugun azken datua. Gipuzkoan, 4. eskualdea da 7tik. Gipuzkoako 19.616 €-ko errenta pertsonalaren azpitik dago. Hego Euskal Herriko 33 eskualdeen artean, berriz, 7.a da.
Errentak herritarrek jasotzen dituzten diru-sarrerak biltzen ditu. Errenta familiarrak etxe batean sartzen diren diru-sarrerak biltzen ditu: soldatak, pentsioak, langabezia-prestazioak, bestelako gizarte-prestazioak eta beste diru-sarrera batzuk, kapitalaren etekinak, adibidez. Errenta pertsonala, aldiz, "kontsumo-unitateko errenta" oinarri hartuta kalkulatzen da; pertsona bakoitzak eskuratzen dituen baliabideei dagokie, berak sortu dituen ala ez kontuan hartu gabe. Horrela, batez besteko errenta pertsonalaren adierazlea etxe bateko biztanle guztientzat kalkulatzen da ELGA eskala aldatuaren arabera; beraz, 18 urtetik beherakoek "esleitutako errenta" dute.
Goierri, eskualde bezala, errenta altuena dutenen artean ez badago ere, eskualdeko bi herri aurkitu ditzakegu errenta pertsonal handiena duten 1.000 biztanletik gorako Hego Euskal Herriko 25 herrien artean:
Deigarria da 2022tik 2023ra errentak izan duen igoera ikusgarria, %27 igo baita, Goierrin %8 igo den bitartean.
Goierriko 18 herriak aztertzen baditugu, argi ikusiko dugu batez besteko errenta pertsonal handiena duten herriak txikienak direla. Gaintza da errenta pertsonal handiena duen herria, 23.045 eurorekin. Txikiena, aldiz, Itsasondok du; 16.264 eurorekin.
Familia-errenten kasuan ere, hau da joera: herri txikiek dute familia-errenta handiagoa, orokorrean. Hala ere, Gaintza, esaterako, lehen postutik urruntzen da. Izan ere, Goierriko familia tamaina txikiena du: 2,1 pertsona bizi dira etxeko. Altzagan, ostera, 2,9. Horrela, Altzaga errenta pertsonal baxuena duen 3. herria izatetik, familia-errenta altuena duen 3. herria izatera pasatzen da.
Goierrin, 2016tik 2023ra, %24 igo da errenta pertsonala. Gipuzkoan, aldiz, %30. Eskualdeko herrien artean, Gaintzan igo da gehien, %56, errenta pertsonal altuena duen herria izatera iritsi arte. Ormaiztegin %31 igo da denbora tarte horretan, baina 2022tik 2023ra bakarrik %27 igo da, 13. herria izatetik 3.1 izatera pasaz. Zaldibia da, aldiz, errenta pertsonala gutxien igo den herria: %17 2016tik 2023ra. 1000 biztanletik gorako herrien artean Legorretan hazi da gehien: %38.
Familia-errentari dagokionez, %27 igo da Goierrin, Gipuzkoan %30 igo den bitartan. Herrietara begiratzen badugu, Olaberrian igo dan gehien: %50, hain zuzen ere. Legorretan ere hazkunde handia izan da: %47. Herri handien artean Beasainen igo da gutxien, % 16, Ordiziarekin (%28) eta Lazkaorekin (%26) alderatzen badugu. Goierri osoa kontuan hartzen badugu Arama da familia-errenta gutxien hazi den herria, %6 besterik ez. Hala ere, bigarren postuan dago orain, Gabiriaren atzetik.
Dena dela, Iker Galparsoro Goiekiko zuzendariaren arabera, errenta pertsonala edota familia-errenta ez dira aldagai egokienak zonalde bateko biztanleen gehiengoaren egoera ekonomiko ebaluatzeko. Izan ere, batez ere herri txikietan, errenta oso altudun biztanle edo familia gutxi batzuek batez bestekoa gehiegi disortsionatu dezakete. Berdin errenta baxuenen kasuan. Bere ustez, mediana askoz egokiagoa da horretarako, biztanle gehienen errealitatea islatzen duelako.
